Mau hman ṭangkai

Commerce & Industries Minister chuan tun hnai khan Sairanga agarbati kuang siamna tur Bamboo Processing Factory a hawng a, hei hi Bamboo Deve-lopment Agency-in National Bamboo Mission (NBM) hnuaiah cheng nuai 125 senga din a ni.

Mizoramah agarbati kuang siamna hi tun hma pawhin din a lo ni tawh ṭhin a, beisei anga kan hlawhtlinpui loh avangin tun ṭuma mi hi chu hlawhtling ngei tura kalpui a ṭha hle ang. Zêp thu a cheng lo a, MNF-in sorkarna vawn fung an chelh hmasak zawk khan agarbati kuang siamna tura industry din hi an ṭhahnem hle mai a, sum ṭhahnem tak subsidy aṭang ringawt pawhin an lalut a, chutah chuan mi langsar tak tak chhungte hming pawh a lang fur a ni. Kha'ngte kha hlawhtling se chu Mizoram hian mau hmangin hlawkna lian tham a nei tawh tur a ni a, nimahsela a taka industry kalpui tak tak lo, a phena subsidy ringawt ûma kalpui tia puh theih tur an nih hlawm avangin a hlawhtling ta vak lo a ang ber.

Tunah sorkarin BDA hnuaiah sum ṭhahnem tak hmangin tun hmaa kan hlawhtlinpui loh bawk kha a han kalpui leh dawn ta a ni a, a sum hi kan state budget ni loa National Bamboo Mission aṭanga lo kal a nih avangin a lawmawm lamah i ngai phawt ang. Tun hmaa tihsual aṭangin inzir ila, agarbati kuang siamna tur sum ṭhahnem tak dawng tawh state kan ni tih hre rengin hlawhtlinpui tur ngeiin thawk tawh ila a ṭha hle ang.

Agarbati kuang siamna mai ni lo a lian thama mau hman ṭangkaina tur dang hi kan sorkar hian tun aiin dap chak se, mau phurh chhuahna link road laih kher ngai loin kan mau hi ṭhahnem tham tak state pawnah thawnchhuah a ni reng tih hre chungin, kan neih sa hman ṭangkai dan hi dap zel a ṭul hle a ni. Sorkarin mau hman ṭangkaina tur ruahmanna ṭha tak a siam hi a lawmawm a, a bul ṭan tawh hi a tawp thlengin bawhzui se, tuna mi hi chu hlawhtlinpui ngei tawh se a lawmawm ang.