Lockdown kalphung thar leh hripui
Sorkar laipui chuan Covid-19 hri lêng avanga inkharkhip hun chhung chu kar hnih atan a pawtsei leh ta. Hetihlai hian ruahmanna tharte siamin a hlauhawm dana zirin a inthlah dul hret hret a, Mizoram pawh Green Zone-ah awmin lockdown avanga inkhuahkhirhna tam tak chu thlah dul a ni ta.
Mizoram sorkar pawhin lockdown kalpui chhunzawm zel dan tur a duang ve nghal bawk a, a hma ai chuan mipui an zalen tawh dâwn tih a chiang. Lirthei veivak a tam sawt ang a, khawlaiah mipui an vak chhuak ṭan ang a; state pawn lama tangkhangte an lo haw ve chiah nen, tun hi inven uluk a ṭul hun a ni awm e.
Inkharkhipa inkhung reng theih a ni lo a, sorkar hnathawkte anga thawh loh pawha hlawh la reng thei lo hi mi tam zawk an ni. Eizawnnaah an kal chhuah a ngai a, hnathawka an tei chhuah a ṭul tawh a; nimahsela a hmaa kan hlauh leh ṭih em em mai Covid-19 hri hi a hlauhawm ngaiin a la hlauhawm reng tih leh, kan ṭhenawm ram leh state-ah a la lêng mêk zel tih kan hriat tel a ṭha hle.
Sorkar chuan kan dam khawchhuahna a ngaihtuah a ngai a, economy lam vên a ṭul bawk si avangin hreh tak chungin loh theih lohna avangin lockdown hi a thlah dul hret hret a, hei hi zalenna dár a vaw ta tihna a ni lo a, kha leh chen kan insûm tawhna leh thu kan awih tawhna kha a thlawn a chan mai lohna turin, fimkhur takin hun i hmang chhunzawm zel ang u.