Zan curfew neih a la ṭul em?

Mizoram sorkar chuan Covid-19 hri leng avanga inkaihhruaina thar a tichhuak a, December 1 leh kum thar january 15 inkarah zan dar 9 aṭanga a tuk zing dar 4 thleng curfew kalpui chhunzawm turin a ti.

Mizoramah, a bikin khawpuiah hian zan curfew hi an kalpui rei ta hle mai a, hei hi hripui leng laka invenna a nih vangin tawngpawng sawisel chi a ni lo ang. Chhun lamah loh theih lohna avang leh eizawnna avangin chhuah a ṭul a, zan lamah mipui an chhuah tam lohna tura ruahmanna a nih avangin hripui dona kawng khat a ni tih hi pawm thiam a ṭha.

Chutihlaiin zan curfew hi tunah chuan hripui dona hlawhtling tak a ni lo tih a lang reng tawh a, India ram state lian zawkah zan curfew an hlihna a rei tawh laiin an state-ah hripui pawh a tlahniam chho zel a, chutihlaia hripui do hneh lo pawlin zan lama curfew kan puang chhunzawm zel erawh ngaihtuah nawn a ṭha khawp mai. Zan curfew hi Covid-19 dona atan kan hmang a, chu chu a ṭha tawk lo tih; hri vei tlakhniam chak loh danah a lang reng tawh a, chu hmanraw hlawhtling lo zan curfew bawk chu kan hunpui lai berah kan hmang nawn leh dawn a nih hmel.

Curfew hi kan puang duh a nih pawhin khawpuiah chuan zan dar 9 aia tlaia puan hi a ṭhat zawkna a awm hmel a, zan lama eizawng tam takte nun a tibuai rei tawh hle a ni. Zan lam eizawng hi tam lem lo mah se, zan lama eizawng awm chhunte hi thla 20 dawn an hna ngai chhunzawm thei loin an awm tawh tih sorkar hian hriatthiampui se a ṭha hle ang.

Khawpuiah chuan Krismas dawnah 'zan bazar' te an siam ṭhin a, chhun ên laia bazar tâwt tur thlengin a veng ve thei a, dawr hawn hun a rei poh leh a ruala mipui chhuak an tlem sawt dawn tihna a ni a, hetiang aṭanga thlir pawh hian zan dar 9-a curfew puan hi chu a fuh lo thei. December 31 zanlai pelhah kohhran tam takin 'zanlai inkhawm' an hmang ṭhin a, Krismas vuakvetah zan dar 9 hnu lam programme-te pawh hman ṭhin a ni. Chhun lama hun hman khap a nih lem loh chuan zan lama inhrek viau hi thil fuh ber a ni lo thei a, sorkar hi a fimkhur a nih pawhin a dar bituk tal hi ennawn thei se a ṭhat zawkna a awm ngei ang.