Kan Ṭan rualna tur HIV/AIDS

Mizorama World AIDS day an hmannaa thusawitu Health Minister chuan HIV/AIDS do kawngah Ṭan rual a Ṭul thu a sawi a, kan ram dinhmun a Ṭhat loh avangin lungrual taka HIV/AIDS do tura ke pen a Ṭul thu a sawi.

Kan ram dinhmun hi kan thlir chuan a him lo hle tih a chiang mai a, tun hnaiah hripui leng dang a awm avangin hemi karah hian HIV/AIDS dona hi kan inthlahdah palh ang tih hlauhawm tak a ni. Kan rama HIV/AIDS darh dan leh chumi nghawng kal zel avanga nunna chan, eizawnna thawk chhunzawm thei lo leh khawsakna kawnga harsatna tawk awm dan chhut hian he ram hi kan Ṭan rual a hun ta hle a ni.

Tun hma deuh khan HIV/AIDS dona kawnga Ṭan la lehzual tura kohhran phûtna kha a nasa hle a, hei hi kohhran pawhin a hria a, kohhrana Ṭhalai pawlte leh a kohhran pum pawhin HIV/AIDS do kawnga ke an penna hmuh tur a awm ta zel a, tun aia nasa zawkin an Ṭang ang tih pawh a rin theih. hetihlai hian mipui nawlpui zingah hian he natna hri hi a hlauhawm a ni tih hre lo, a kai theihna hre reng chunga inveng lo leh fimkhur lo an awm belh zel avang erawh chuan kan rama HIV/AIDS lo lut tawh hian min kiansan tawh dawn lo tih hi kan pawm tlan a hun hle a ni.

Kan ramin harsatna tam tak kan tawh zingah HIV/AIDS avanga kan tawrhna hi mipui nawlpui hriat si loh hian a thûk hle tawh tih kan hriat tlan a Ṭha a, he dinhmun Ṭha lo taka kan ding tawh hi kan inkhai chhuah lehna turin sorkar tha chakna a tâwk lo a, NGO leh kohhran Ṭanlakna pawh a tâwk lo a, mipui náwlpui hi HIV/AIDS do kawngah kan harh chhuah a hun ta takzet a ni.