Aizawlah kawng chhâwng

New Delhi-a sorkar laipui hotute dàwra zin Chief Minister chuan Housing and Urban Affairs leh Petroleum and Natural Gas minister Hardeep Singh Puri a kâwm a, Aizawla kawng chhâwng siam chungchang a sawipui a; Aizawl tihchangkanna tura sorkar laipui project kal mek Smart City fund aṭanga siam rem theih dan a awm a nih chuan; Smart City project hnuaia sum chu kawng chhawng siamna atan hman phalsak a nih thu Union Minister hian a sawi.

Aizawla kawng chhâwng siam tum hi politics-a titi siamtu tak pakhat a tling a, kum 2018 Assembly inthlan dawna MNF President thu sawi a ni. Kawng chhawng siam a tum a ni mai lo a, traffic jam awm lohna khawpuiah Aizawl hi chhuah a tum a, a sawi thiamin a tui bawk a, sawi zui a hlawh hle a ni. A thutiam leh thusawite tihhlawhtling thei dinhmunah dingin Chief Minister a ni ta a, kawng chhawng hi siam thei ngei se a inhmeh hle a ni.

Tuna Smart City project-a sum awm sâ thil dang atana ṭangkai taka hman theih aṭanga kawng chhawng siam tura tih erawh ngaihtuah ngun a ṭha maithei a, Aizawl khawpui hian mamawh tam tak a ka nei a, khawpui tihchangtlunna tura sum awm sâ ni lo hi kawng chhawng siamna atan dil chhuah theih dan awm se a lawmawm hle ang.

Kawng chhawng hi siam ngei theih ni se a ṭha ang a chutih rualin khawpui hmasawnna tur Smart City prihlject hnuaia sum awm sâ pawh pên erawh a uiawm dâwn a, Smart City project sum hmanga hmasawnna hna dang thawk chung hian kawng chhawng siamna tur sum hi kan Chief Minister hian sawi chhuak thei se a duhawm hle a ni.