Sum chingpen thu kal kual dan

Cheng nuai 1,000 chuang sum chingpenna nia sawi, Swadesh Dharshan scheme hnuaia Sakawrhmuituai tlanga skywalk leh Chaltlang leh Durtlang inkara ropeway siam chungchang chu Anti Corruption Bureau (ACB) chhui hmasak turin Lokayukta chuan thutlukna a siam.

He sum chingpen nia inpuhna hi politics nen kaihkawp a nih tak avangin mipui tan thudik hriatthiam a harsa hle mai a, a chhuitu tura an duh pawh a inang lo thluah a ni. MNF lamin he thilah hian thubuai thehlutin Lokayukta chhui turin an duh a, Congress pawhin he thil hi chhui ngei duhin state chhunga mite ni loin Central Bureau of Investigation (CBI) law law chhuitir an duh thu an puang tawh. Tun hnai khan ZPM Ṭhalai pawh he thilah hian thu dik hailan phûtin an pungkhawm a, CBI ko lut turin Chief Minister an ngen.

He thil lo irh chhuah dan leh a kal zel dan chhût hian ngaihṭhat lohna a piang lo thei lo a, cheng nuai tam tak chingpen ngei nia lang si a hre chiang chinte an ngawi rei em em mai hi a ni. Tuirial bial bye-election kha awm lo ta se he thil fel lo hi sawi chhuah lohin a liam lo ang tih pawh a sawi theih loh a, dikna duh vang ai mahin vote duh vanga sawi chhuah leh hnuhnawh a ang lek lek a ni.

Thubuai lian tham hi chu CBI ngeiin chhui se duhthusam a ni a, chutih rualin ACB pawhin thil dik lo a awm a nih chuan an hmuh hmaih bik lo turah ngai ila; cheng nuai tam tak riral nia lang hi a nihna tak Mizo mipuite hriattir ni se, tidik lotu an awm a nih chuan dan anga hrem ni rawh se.