CM pahnih inkawm hnu ramri

Chief Minister Zoramthanga chuan tun hnaia new Delhi-a Union Home Minister hmaah Assam Chief Minister nen boruak ṭha tak hnuaiah ramri chungchang an sawi dun thu a sawi a, "Boruak ṭha siam a ni," a ti.

Assam leh Mizoram buaina chu kan ramri nia kan chhal a inang lo hi a ni a, a tu zawk zawk emaw kan tawlh a nih loh chuan ramri buai hi chinfel theih niin a lang lo. Tuna kan awm dan hi kan lungawi a nih chuan kan ram chin hi thui tak kan chân dawn tihna a ni a, state pahnih Chief Minister inbia hian eng thu chiah nge an sawi hre lo mah ila boruak ṭha an siam a nih chuan inremna chin an nei niin a ngaih theih.

Hetihlai hian Mizoram sorkara Council of Minister-in ramri-a a pawm chin leh Mizoram sorkarin ramri ngaihtuahtu tura committee a din Deputy Chief Minister kaihhruai chuan kum 1875-a ramri rin tawh bak chu ramri dang an pawm loh thu an lo chhuah tawh a, he ramria kan chhal hi kan Chief Minister hian a zuk sawi nge sawi lo hi hriat a chakawm khawp mai.

Assam-in tuna kan chenna leh kan ram luah chin min rawn chuhpui loh chhung chu 'boruak ṭha' hi chu a awm reng a, kan rama lo luta kan huan leh lote min chhuhsak an tum a, kan police duty post hial min hneh chhuh an tum avangin boruak a ṭha lo ta mai a ni. Tuna kan Chief Minister pahnihte'n boruak ṭha tak an siam hian ramri chin an kawk nge, intibuai tawn lo turin thutlukna an siam, tihte pawh mipui hnenah puanzar theih ni se a duhawm hle.

Tuna mipui hriat chak ber tur chu Chief Minister pahnih an inbiak hnua ramri chungchang hi a ni a, a ngai kan ring a nih chuan hmasawnna awm lo a ang dawn a, ramria kan chhâl leh kan lungawina ramri hi thuhmun a ni lo palh ang tih hlauhawm tak a ni.