Chief Minister thil rawn hawn

Mizoram Chief Minister chu hun rei tak chhung New Delhi-ah sorkar laipui dàwrin a zin a, Mizoram a lo haw hnuah thuthar thehdarhtute kawmin a zinnaa thil tawn hrang hrangte sawiin a zin hlawhtling hle nia a hriat thu a sawi.

Kan Chief Minister thil rawn hawn hrang hrangte hi a mal te te pawha kut ben hnan tham khawpa hrawl leh ropui a ni a, hengte hi a hlawhtling a nih ngat chuan Mizoram tan pawh hmasawnna tur a ni ang. Mau hi kan state sorkar chuan flagship programme a nih thu an sawi ṭhin a, kum hnih chuang an sorkar hnuah kalpui tum dan mumal tak mipuiah an la puang thei lo a, tunah hian mau lak chhuahna tur bamboo link road siam kawngah sorkar laipui an hmin niin a lang a, cheng vaibelchhe 100 hu DPR thla khat chhunga siam tura an ti hi thil lawmawm tak a ni.

Assam nena boruak ṭang deuh nia lang pawh an vaw dai vek niin Chief Minister hian a sawi a, hei pawh hi thil lawmawm tak a ni a, chutih rualin ramri chungchangah hi chuan a boruak lam aiin a rama hi kan ngaih pawimawh tur a ni a, ama ho ngeia Council of Minister-in ramria an pawm chin 1875 ramri hi a zuk sawi chhuak em ang chu maw?

Prime Minister pawh a tilawm hle niin amah ngeiin a sawi a, hei vang hian duhsaknain a rawn umzui ngei a beiseiawm a, kan Chief Minister ngeiin Prime Minister nen an indawrna boruak a report aṭanga a lan dan hian Mizoram tana thil ṭha ṭhahnem tak a rawn hawnpui ngei a beiseiawm a, chu chu mipuiin nghakhlel takin an lo nghak dawn a ni.