Ramria kan dinhmun a chiang zel

Home Minister chuan ramri buai chinfel a awlai lo tih sawiin, "Mizoram sorkar chu 1875 BEFR notification-ah a ding nghet a, Assam lam chu 1933 notification-ah an ding thung a ni. Ramri chingfel tur chuan pakhat duh dan ngawt a tlang thei lo," a ti.

Chief Minister zin khan New Delhi-ah Union Home Minister leh Assam Chief Minister a hmu a, ramri chungchang sawiin boruak ṭha tak an siam niin a sawi a, Mizote tan pawh a lawmawm hman hle a ni. Chutihlaiin, ramriah hian Assam-in kan ram luah mek min chuhpui a nih loh chuan keini lam chuan 1875 ramri pawh kan zuk hauh ngam tawh lo a, kan luah chinah kan lungawi a, ramriah boruak ṭha lo a awm hran lo.

Tun hnaiah Assam-in an rama an pawm chin 1933-a ramri chu an rawn chuh a, kan ram chhunga an awm sa tawh piah lamah a aia thûk zawk rawn luh tumin min rawn tibuai a, indaih lo leh sum nei lo chungin Mizoram sorkar pawhin ramriah sipai ṭhahnem tak a dah a ngaih phah hial a ni. Hei vang hian ramriah boruak a ṭha lo a, Chief Minister pahnih inkâwmin 'boruak ṭha' an siam an tih hian ramriah ngaihdan fel tak an siam tawh turah a ngaih theih.

Home Minister-in ramri nihna dik tak a rawn sawi chhuak a, Assam leh Mizoram hian ramri tia kan kawh chin a inang lo a, a tu zawk zawk mah kan tawlh loh chuan chinfel mai a harsat a ring a, hei hi thil awm dan dik tak a nih hmel. Ramria 'boruak ṭha' neih ringawt a, 1875 ramri pawh hauh ngam si loh hi chu ngai pawh kan awh phak lo ang tih hlauhawm tak a ni.