CM boruak ṭha hi Aitlangah lang se

Vairengte bula Aitlanga ram neitu mi eng emaw zat chuan tun thlengin an ramah hna an la thawk ngam lo a, kumin June aṭang khan Assam Police-te an la inkhulh tlat a ni. Assam Police-te hian an inkulhnaa hnathawh an phal loh bakah an duty-na hmun aṭanga lang phak chinah hnathawh an phal loh avangin Aitlang rama loneitute'n hna an la thawk ngam lo a ni.

Tun hnaiah Union Home Minister hmaah Mizoram leh Assam Chief Minister-te ramri chungchang sawiin an inbia a, Mizoram Chief Minister sawi chhâwn danin ramri boruak ṭang pawh a dul vek tawh a, boruak ṭha tak an siam tawh a ni. Chief Minister pahnih ber an indawr tawh hi chuan boruak pawh a muanawm chhoh turah beisei ila, vawi leh khata chinfel duak theih a nih loh pawhin Mizo kuthnathawktute'n an ram an chân loh chu i beisei phawt ang.

State pahnih hotute boruak ṭha tak hnuaiah an inbia a, hei hian rah ṭha a chhuah ngei a beiseiawm a, tunah a takin hmu nghal lo mah ila nakin lawkah chuan Assam Police-te pawhin an duty-na hmun chhuahsanin ramriah boruak ṭha lehzual a awm theih beisei zel ila; amaherawhchu chutiang thil a thlen loh a, Aitlang ram neitute'n an ram pawh an hauh zui ngam loh a, Assam Police-in kan ram an luah tlat si chuan Chief Minister pahnih inbiakna 'boruak ṭha' tih ringawt hi chu boruak mai tak tak a chang palh ang tih hlauhawm tak a ni.