Sorkarin bill pe tlai bik lo se

Mizoramin kawphetha a leina ṭhin NEEPCO chuan Mizoram sorkar aṭanga kawlphetha leina man an dawn tlai avangin Mizoram chu kawlphetha pek lohah an vaukhan a, hemi hnu hian Mizoram sorkar chuan NEEPCO hnenah hian kawlphetha man hi rang takin a pe nghal a ni.

Electric bill chungchang hi Mizoram chhungah hun rei tak chhung khel tawh a ni a, mipui nawlpui tana phurrit tling khawpa bill a sang nia hriat avangin sawiselna ri pawh a ring hle. Hetih laia a sorkar zawkin kawlphetha leina sum a lo pe tlai tih hriat hian thil inhmeh lo tak a ni a, mipui hnena bill sang zawka khawntu ni chunga a leina lama pawisa a lo pe tlai hi chu a zia lo hle a ni.

Mipuiin electric bill kan pekkhawm hian Mizorama kawlphetha lakluhna man hi a daih lo a, sorkar hian chawi belh chungin êng chhit tur hi mipui hnenah a pe a, hemi kawngah hi chuan a fakawm hle a ni. Sorkar sum indaih lohna sang zelah electric bill hi tisang lo thei lo dinhmunah a ding tawh a, sorkarin sum a hloh zat a pun zel bawk avangin mipui aṭangin a bill man sang zawkin a khawn ta hial a ni.

Mipuiin ṭha taka a bill an pek laia NEEPCO-in vaukhan ngai hial khawpa kan sorkarin sum a lo pe chhuak tlai hi a zia lo takzet a, a mipui lamin sorkarah bill an pe thei lo tih ni lo a; a sorkar zawkin a leina hnena sum a pe thei lo hi chu a mualphothlak thei hial a ni. Sorkar tan sum neih loh hrim hrim hi a mualphothlak vek kher lo thei a; nimahsela mipui hnena thutiam hrawl pui pui nei chung leh, cheng vaibelchhe tela SEDP kalpui tum thu sawi dup dup si a, NEEPCO-a pawisa bat leh si hi a inhmeh lo hle a ni.