Sorkar sum neih dan

MPCC Media department chuan Mizoram State Health Care Scheme (MSHCS) hnuaiah damlo bill pek theih loh tam tham tak an awm tih press mite hmaah an puang a, "He harsatna hian MNF sorkar sawngnawizia leh sum leh pai enkawlna kawnga an hlawhchhamzia a tarlang chiang hle," an ti.

Tun hnaiah eptu pawl lamin Mizoram sorkar sum enkawl dan an sawiselna hriat tur a awm zauh zauh a, sorkarin Treasury aṭanga ni khata pawisa pek chhuah theih zat a siam dan te, contractor leh supplier bill tam tak a tân thu te, sorkar laipui aṭanga project leh scheme awm sa atana pawisa lo kal pawh pe chhuak thei loa sorkarin sum a neih loh thute sawi a ni. Hei mai hi ni loin tun hnaiah Mizoram sorkarin kawlphetha a leina NEEPCO phei chuan Mizoram sorkarin bill a pek loh avangin kawlphetha tihtawpah a vaukhân hman hial a ni.

Hetianga sawiselna karah hian Chief Minister leh Finance minister ni bawk chuan kum tharah hian SEDP atan cheng nuai 30,000 - 40,000 hmanga bul ṭan a nih tur thu tun hnai khan a sawi thung. SEDP atana sum an lo dah hrang thei a nih chuan thil lawmawm tak a ni a, mipui hnena cheng nuai 3 sem an tiam angin sem thei ngei se duhthusam a ni a; nimahsela SEDP atana sum an khêk hi hmasawnna hna dangin a tawrh phah a nih chuan ram tan thil pawi tak a ni thei.

Sorkar hnathawkte'n a hunah hlawh an la thei lo a, mahni pension pawisa ngei ngei pawh an la chhuak thei lo a, chutihlaia a nuai telah pawh a sing bia 'sem' lo sawi hi thil mak angreng tak a ni a, sorkar hian a duhnaah sum a neiin a duh lohnaah chuan nei lo angin a awm mai niin a lang ta hial a ni ber mai.