Raltlante dinhmun leh sorkar

Mizoram Chief minister chuan tun hnai khan Myanmar buaina avanga Mizorama rawn lut Myanmar ram hruaitute a kâwm a. Ráltlânte tan Mizoramin theihtawp a chhuah zel tur thu a sawi a; India sorkar hotute bulah pawh ráltlânte chhawmdawl chungchang vawi tam sawipui tawhin, tun hnaia Prime Minister leh Home Minister a hmuh ṭum pawhin tuamhlâwm an mamawhzia a sawi­pui tih a sawi.

Mizoramin Myan­mar aṭanga sahim­na zawnga Mizo­rama rawn lutte a ngaih­venin theih­tawp a chhuah a, he mi kawng­­ah hian state sorkar pawhin ṭan a la hle tih a lang. Ramria khaw hrang hrangin an theih ang angin raltlante khawsakna tur an sa a, a ṭhente chu sikul leh khawtlang hall leh a remchang apiangah an riak bawk. Hripui lenlai a lo ni bawk nen fimkhur tak chunga raltlante dawnsawn a ngai a, ramri khuate an rimin an thawk ṭha takzet a ni.

A ram pum huap pawhin kan tlawmngai pawl hrang hrang an thawk ṭha hle a, mahni remchan anga Myanmar raltlante hnena ṭanpuina hrang hrang khawn an awm reng. Zaithiamte leh kan milarte pawhin mipui hnenah raltlante'n puih an ngaihzia au chhuahpuiin anmahni ngeiin vehbur khawnin sum an tuaksak a, raltlante pui tura kan ṭan rualna a lawmawm hle.

Mizoram sorkar pawhin raltlante dinhmun hriain theih­tawp a chhuah a, sorkar laipui lamin politics thil avangin rawn ngaihven ṭha vak duh lo mah se Mizoram sorkar hotute'n sorkar laipuiah Myanmar aṭanga raltlante chhawm­dawlna tur hi an dilsak reng a, a lawmawm hle.

A lehlam zawnga thlir chuan MNF President leh tuna kan Chief Minister-in Chief secretary atana a duhzawng mi a dilnaa a ṭawngkam hman, 'NDA-ah a tir aṭangin rinawm takin kan awm tawh a, duhsak kan phu,' ti lam hawia sorkar laipui a karna kha tun hi a hman hun tak a nih hmel zawk mah a; sorkar laipuiin politics thil avangin Myanmar raltlante chhawmdawl thei lo mah se politics thil avang vêk hian Mizorama sorkarna vawnfung chelh mektute hian BJP (NDA) sorkar hi chhawmdawlna sum an dil chhuah theih i beisei ang.