Inkharkhip dan thar leh mipuite

May 4-17 chhunga Mizorama inkhârkhip dan tura kaihhruaina State Disaster Management Authority-in a siam chu puanzar a ni ta. Mihring phur chi lirtheite tlân phal a ni tawh dawn a, dawr ṭhenkhat hawn phalsak an ni a, chutihlaiin zirna in hawn, biak-ina inkhawm leh mipui punkhawm erawh phal a la ni lo. 

Thla khat aia rei kan inkharkhip tawh hnuah Covid-19 a la hluar zel avangin India ramah lock­down kalpui zel a la ni a; nimahsela tunah chuan hri vei an tlemna hmun deuhah chuan inkaihhruai dan pawh a dul ta hret. Pawn chhuak an tam sawt a, lirthei veivak a pung a, mipui ṭhahnem takin eizawnna an chhunzawm leh thei ta. 

Hei tak hi ngai kan awh leh ta emaw kan tih palh mai a hlauhawm a, hri leng kan hlauh em em lai ai khan tunah hian Mizoram hian Covid-19 hi kan hnaih tawh zawk a ni tih kan inhrilh nawn fo a ṭha awm e. Pathian zarah Mizoram chhungah chuan Covid-19 positive hi mi pakhat chiah a la awm niin a lang a; nimahsela kan ṭhenawm ram Myanmar-ah pawh Mizoram aṭanga hla lo te teah hri vei an pung chho zel a, kan ṭhenawm state-ah Covid-19 positive hmuh chhuah thar an awm zel bawk. 

Mipui nawlpuiin eizawnna an chhunzawm a ṭul si avangin loh theih loh avangin khuahkhirhna ṭhen­khat thlah dul a ngai a, hei hi pawn chhuah phalna anga ngaia kan inthlahdah mai zawngin kan tuar palh thei tih kan hriat a 

ṭha ang. Sumdawnna hmun ṭhenkhat an chhunzawm a, lirthei an tlan leh tak avangin hri hi a awm ta lo a ni lo a, a hlauhawm ngaiin a la hlauhawm reng tih kan inzir thar a ṭha hle. 

Hri leng laka kan him theihna turin pawn chhuak lo tura insûm zel a la pawimawh reng a, kut silfai a la ṭul chhunzawm zel a, hmai tuam loa pawn chhuah phei chu pawisa chawia hrem theih an ni tih hriain, mipuiin inkharkhipna dan thar hi pawn chhuah phalna zalenna dar a ni lo tih i hria ang u.