India sorkar hian Mizote thu ngaihsak rawh se

Mizoram Rajya Sabha MP chuan tun hnai khan Parliament thlasik ṭhutkhawmah Myanmar aṭanga raltlan Mizorama lo lutte dinhmun a sawi chhuak a. Raltlan 15,000 vel an awm mek thu leh Mizoram sorkar leh tlawmngai pawlte'n khaw 15-ah refugee camp siama an enkawl thu a sawi.

MP hian sorkar laipui chu raltlante ṭanpui tura pen chhuak turin a ngen a, hripui leng karah Mizo mipuite'n kawng hrang hranga raltlante an ṭanpui dan a sawi chhuak a ni.

Mizoramin Myan­mar aṭanga raltlante a buaipui dan hi India ramin a hre tawk lo a nih pawhin tunah chuan India rorelna in sangah sawi chhuah a ni ta a, a sawi chhuaktu kan Rajya Sabha MP a fakawm hle.

India sorkar hian raltlante dinhmun hi a hre duh lo a nih pawhin tunah chuan loh theih lohin rorelna inah ngei sawi a ni tawh a, thil thlen dan leh awm dan a hre tawh a, Mizoramin sorkar laipui kan auh dan pawh a hre chiang tawh hle ang.

Tun hnaiah kan Chief Minis­ter pawhin Prime Minister hnen­ah ngei Myanmar aṭanga raltlante'n ṭanpui an mamawh­zia hi a lo sawi tawh a, sorkar laipui lamin aw an nei duh lo chung pawhin Mizo mipuite'n raltlante hi lo dawng­sawngin khaw hrang hrangah an chenna tur hmun buatsaih a ni a. An sahimna tura an ṭanpui bakah ei leh in tur leh damdawi mamawh bakah an zirna turte thlengin an ruahmansak.

Heti taka kan harsatna kan thlen hnu leh, Myanmar aṭanga raltlan kan unaute'n puih an mamawhzia a sawi theihna hmun apianga kan sawi tawh chung pawha sorkar laipui aṭanga chhawmdawlna leh ṭanpuina min pe duh lo zel a nih chuan a lawmawm lo hle ang a; India sorkar hian Mizo mipui, pawl hrang hrang, kohhran leh sorkarin raltlante a chhawmdawlna hi pui ngei rawh se.