Bru leh Mizoram inthlan
Tripura refugee camp-a awm Bru, Mizoram electoral roll-a chuangte paih a, Tripura electoral roll-a dah luh an nih theihna turin hmalak chhunzawm zel a ni.
Mizoram Election department hotute chuan Bru-te electoral roll aṭanga paih a nih theihna turin thil pawimawhte Election Commission of India (ECI)-ah an thawn tawh a ni.
Tripura-a anmahni duh thu ngeia chhuk Bru-te hi kum tam tak chhung chu Mizoram tibuaitu an ni tawh a, a bikin inthlan dawnah buaina lian tak an chawk chhuak ṭhin. Anni lam hian an 'vote' neih hre ranin Mizoram political party lam hi an rawn chhaih buai thiam a, kan political party zingah Bru raltlante vote duh lo ngam emaw, chuh lo ngam emaw kan neih bawk si loh avangin inthlan dâwn apianga buaina thlentu an ni ta ṭhin a ni.
NGO leh Kohhran hruaitute nena awmho laia Bru raltlante vote duh lo anga lang, an hmuh phak loh china pawisa nena Bru refugee camp thlenga unzui hreh lo political party kan nei hi a vanduaithlak takzet a; inthlan dâwn apianga Bru-ten min tihbuai theih chhan pawh hi keimahni insiam chawp thil a ang lek lek ṭhin.
Tunah erawh chuan Tripura lama awm hlen turin an pêm dâwn ta a, Mizorama an thil neih hlu an 'vote' pawh an pempui hlen dâwn ta a nih hmel a, a lawmawm hle.
Mizoram sorkar leh thuneitute hian heng Bru-te vote hi Tripura lamah a rang thei ang bera sawn a nih theihna turin chak takin hma la zel se a lawmawm ngawt ang.