YMA inrawlhna tur chin

YMA General Conference tun hnaia zawh takah, "Mizoram ramri hi sorkarin a rang lama chinfel dan ngaihtuah rawh se,' tih an rel.

Ramriah buaina a awm reng rengin Mizo mipuite'n sorkar an ngaichang ang bawkin Central YMA thu an ngaichang tel bawk ṭhin a, tun hnaia ramri buaiah CYMA lam thu leh hla hriat tur a tam lo hle.

Hei hi sawifiahin Central YMA Presi­dent kal chhuak tur chuan CYMA-in theihtawp a chhuah thu te, buaina chhuahna hmun an tlawh ṭhin thu te, mipui hmaa an puanzar loh avanga mipuiin hma la tawk loa an ngaih mai zawk thu a sawi a; mipuiin an duh khawp lohnaa an sawiselna chu huata la mai loa insiam ṭhat tumna atana hmang turin a chah.

YMA tan hian ramri buai chinfel hi thil theih a ni lo a, sorkar leh sorkar indawrna tur chi a ni. Chutihlaiin Mizoram chhunga chengte thlavang hauh tur te, a ṭul anga YMA anga tih theih leh tih tur awmte thawk zung zung tura beisei an nihlaia CYMA lam thawm hriat tur a tlem deuh kha chu inenfiah an ngai ve ngei ang.

CYMA hian sorkar a thawh­puiin a thlawp tur a ni a, chutih rualin sorkar emaw tih mai tur khawpa muang chuar mai leh sorkar chet rual zel chauha a chet chhuah chuan ramri thilah ni lo pawh Mizo mipui duh khawp a tling lo fo thei.

Tun hnaiah ramri thilah a ni emaw, thil dangah pawh CYMA tihâwm leh a inrawlhna tura mipuiin an beisei chin hi a awm a, chutiangah chuan sorkarin a thunun ta emaw tih palh theih tur khawpa ngawih chuh tlat lohin, mipuiin YMA tih tura kan beisei ang ti zar zar thei turin ṭang thar se. CYMA President kal chhuak sawi ang hian insiam ṭha ngei se a lawmawm ngawt ang.