NHM thawktute dinhmun

National Health Mission (NHM), Mizoram hnuaia thawktute chu chhan hrang hrang avangin Mizoram sorkar chungah an lungawi lo a, tiam chin awm loa an chawlh avangin Mizorama damdawi-in Health department hnuaia hna hrang hrangin a tuar mek.

NHM hnuaia thawk hi mi 2,000 chuang niin ṭhenkhat chu Covid-19 donaa mi ṭangkai ber berte an ni a, office-a hna pawimawh khawih­tute bakah damdawi-in lama thawkte an ni. Heng mite hi vawi leh khata lungawi lo an ni lo a, hun rei tak chhung phût neia sorkar lo nawr tawhtu an nih bakah an hna pawimawhzia hriaa chawlh la loa a theih ang anga ṭan lo la tawhte an ni a, an beisei ang an hmuh loh avangin an nuar ta niin a lang.

NHM hnuaia thawktute thil phût hi Mizoram sorkar tan thil tihhlawhtlin vek theih a nih hmel lo a, an thil phut ṭhenkhat hi chu kan sorkar sum dinhmun thlir hian thil tih theih pawh a nih hmel lo. Chutih rualin an thil phût ṭhenkhat erawh an dikna chanvo an phûtna niin a ngaih theih. An thil phût zinga pakhat, anmahni chan tur liau liaua sorkar laipui aṭanga sum lo kal dan anga ni 15 ral hmaa Health department kuta pek tihte phei hi chu phût buai pawh ngai loa pek nghal mai awm a nihlaiin kan sorkarin a ti thei lo hi chu a mualphothlak hle a ni.

NHM hnuaia thawktute an ni emaw, contract-a hnathawk dangte pawh tiam­in sorkar tan hian enkawl dan thiam a harsa hle ang. Department pakhata mite an dah ngheh rual chiahin midangin dah ngheh an phût zui ve a, sorkar sum bawm lam a ruak bawk si nen post âwl reng pawh an hnawh khat thei lo a ni.

Hetiang din­hmuna kan dinlai leh, damdawi-ina thawktute hial an nawrh tawhlaia 'sum sem' tur pawisa tam tham tak sawi rikte hi a inhmeh lo a, kan sorkar sum enkawl dan hi chu duhthusam lo a tam hle a ni.

Engpawhnise hri len laia NHM-a thawktute nawrh ngai khawpa kan sorkarin a enkawl hi a fuh lo a, he thilah hian inremna siam a, a rang thei anga hna an chhunzawm leh theihna turin Mizoram sorkarin a tih tur ti rawh se.