Zu leh sorkar

Tun hnaiah Aizawl SP hmalaknain Aizawla Police Station hrang hrang leh District Special Branch-te chuan Rangvamual leh a chhehvelah zu siamna kaihnawih tihchhiat runpui an nei a; zu siamna 61, zu bilh lai zem 160, zu siamna bungbel bakah hmanraw dang tam tham tak an tichhia.

Mizoramah hian zu khap burna dan (MLTP Act) hman ṭhin a ni a, hun rei tak hman a nih hnuah Congress-in sorkarna vawn fung an chelh laiin dan angin kum 2015-ah zu zawrh leh a ni. Hei hi mi tam takin an duh lo a, MNF chuan sorkarna an chan chuan zu zawrh tihtawpa khap bur a nih tur thu an sawi a, an sawi ang ngeiin MNF-in sorkarna vawn fung an chelh rualin zu khap burna dan thar (MLP Act) an siam zui leh ta a ni.

Zu khap burna dan hmanna hnuaiah Mizoramah hian englai pawhin zu hi lei tur a awm reng emaw tih mai tur a ni a, phai lam leh khaw chhak lam aṭangin a sen chi a lo luh reng bakah tualchhungah zu an sa reng bawk tih phat rual a ni lo. Sorkar hian zu a khap inti chung siin zu tihrem tumin tha a thawh tak tak lo niin a lang a, dan loa zu hmanga sumdawngte an lian chakin zu pawh a zalen leh hman hle a ni.

Tun hnaiah hunpui lo thleng tur denchennin zu dap beihpui an han nei ta a, Rangvamual chhehvelah ringawt pawh zu siamna 61 leh zu bilh lai zem 160 an tichhia hi sorkar mualphona a ni a, zu dap beihpui an thlak loh chuan he sumdawnna hi lian takin a kal reng tih a nemnghet.

Sorkar hian zu hi a khap duh tak tak a nih chuan zu tihrem tumin ṭan la se, kawngpuia mi zu lei sa man khawm maiah duhtawk loin a tak taka zu do beihpui hi a thlak a ngai a, hunpuiah chauh ni loin kum tluanin kalpui rawh se.