Dan loa kuhva sumdawnna leh Mizoram sorkar
Tun hnai khan Kelkang dáia Champhai DC-in kuhva rah a man sa chu hâl a ni a, hemi chungchangah hian kuhva neitu chuan Champhai Police Station-ah FIR a thehlut a, police-in an chhui mek.
Ram pawn aṭanga India sorkar phalna tel loa kuhva laluttu lamin DC laka FIR an thehlut ngam ta hian kuhvaa sumdawngte huangtauzia a nemnghet a tih loh theih loh; kan sorkar mi rawihte'n dan loa zu zawrhte an leih buaa a siamna hmanruate an tichhia a, dan loa ruihhlo lakluhte an hal ral a nih chuan dan loa thil dang lakluhte pawh hi tihchhiat theih loh tawp a ni bik dawn em ni ang?
Myanmar lam aṭanga dan loa kuhva rah rawn lut hi vawi tam sawi a ni tawh a, thil mak tak tak a inphum hnem hle. Dan loa ram pawn aṭanga lo lut na na na Mizoram sorkarin GST a lo la mai te, truck trip tam tak man a ni tawh chunga jail tang zui emaw thubuai nei zui emaw sawi tur awm tam lo te, Covid-19 avanga lock down khirh ber lai pawha an kal tlang thei zel mai te, kan kawngpui lûn laia ualau taka an vei tlang reng thei te, kawngpuia Assam Rifles leh duty dang an khauh deuh avanga anmahnia kawngpui an insial chawp thei ringawt pawh hi thil mak tak a ni.
Kuhva tawlh chungchangah hian ramria khaw ṭhenkhat chuan an khaw pal tlang lirtheite hnenah pawisa an lo la ve zel a, an khaw rama an kalna tur kawng siam an phalsak tihte a lo ni zel a; dan loa thil kalpui nia sawi ualau angreng tak sia an kalpui ngamte hi thil mak tak a ni. Champhai leh Zokhawthar inkara kawng kam remchang laite chu kuhva dahna kudam-in a khat a ni thawthang tawh a, Mizoram pawna an phurh chhuah tur pawh Vairengte daiah a dahna kudam lian pui pui siam a ni. Vairengte daia kudamte pawh ṭhiat tura tih a lo ni tawh ṭhin a, tun thlengin ṭhiah niin a lang si lo.
Kuhva hmanga sumdawnnaah hian Mizoram sorkara mi thiltithei tak takten kan police-te hi an khap a nih ngawt loh chuan, kan chhuan em em ṭhin kan police-te hi an lo tlaw ta hle tia puh mai an awl. Kuhva man theitu hi Custom official lam an nih pawhin kan state paltlanga dan loa sumdawnna kalpui lo dang theitu chu kan state police-te hi an ni a, kan kawngpui an rah chhiat vek thu kan sawi chung pawha man loh bawka an tlang zel hian ngaih a ti ṭha lo hle.
Mipui nawlpui mit hmuha 'smuggling' tia puh theih kalpui mup mupna state nih hi a zahthlak a, mi tlem te hlawkna ûm avanga a state puma smuggling pawmpui anga lan hi a tlawm thlak a, Mizoram sorkar hian dan loa kuhva tawlh hi a pawmpui a nih ngawt loh chuan titawp nghal rawh se.