Krismas Chibai

Kumin atana Vanglaini chanchinbu chhuah hun hnuhnung ber kan lo thleng leh ta a, kum 2022 January 4-ah chhuah chhunzawm leh tura ruahman a ni.

Kum 2021 hi khawvel pumah hripui a len avangin kan zavai atan kum ṭha lo leh buai kum a ni a, mi tam takin Covid-19 avangin nunna hial an chân a, natna khumah mi tam tak muin sum tam tak an seng ral bawk. A dam zingah pawh chhungkaw tam tak eizawnna tihbuai niin ṭhenkhat chuan an eizawnna an chân hial a, zirlaite'n zirna an chhunzawm hleithei lo bawk.

Chanchinbu lam eizawn­na hi hripuiin a nghawng nat ber zinga mi a ni a, mi­thiamte finfiahna awm si loa insawi ṭhaihna avangin chanchinbu hmanga hripui theh darh theih angin a thang chiam a, mi tam takin chanchinbu an lâk ṭhin an titawp ta hial a ni.

Khawvel hmun dang ang bawk­in Mizoramah pawh sum­dawn­nain nasa takin a tuar a, chu chuan chanchinbu lama man chawia infakna (advertisement) lam pawh nghawngin sum lakluh nasa takin a tlahniam. Chutihlaiin kan la dam khaw chhuak leh kum tawp kan thleng thei hi malsawmna a ni a, he hripui hian zawi zawia min kiansan i beisei zel ang.

Hripui kara hun­pui hmang tur kan nih angin mahni ṭheuh fimkhur thiam ila, kohhran puma Krismas ruaiṭheh a rem loh avanga chhungkua leh ṭhianhoa inhmuh khawm pawh a theih chin chinah pumpelh tum ila. Him tak leh hlim takin Lal Isua Krista pian champhaphak lo thleng tur Krismas hi i hmang ang u.

Vanglaini chhiartu zawng zawngte Kirsmas chibai kan buk a che u.