Krismas urlawk

Vawiin hi December 24,2021 a ni a, Mizote chuan 'Krismas Urlawk Ni' kan ti ṭhin. Kan hma lawka Lal Isua Krista pian champhaphak lo thleng tur atana kan inbuatsaihna hun hnuhnung ber a ni.

Urlawk ni hi kum dangah chuan mipui tam zawkin an hna an chawlhsan tawh avangin Krismas mamawhte lama bazara an kal chhuah hun a ni ṭhin a, Aizawlah chuan mipui veivak an ṭhathnem ṭhin avangin lirthei kal theih lohna hmun bîkte siamin kein kawngpui lunlaiah mipui an tei suau suau ṭhin. He hun hi ṭhalai tam tak nghahhlelh a ni a, a Krismas boruak piah lamah sumdawngte tán pawh hun duhawm bîk a ni ṭhin.

Kumin erawh chu hripui avangin heng zawng zawng hi a remchang lo deuh vek dâwn a, Krismas bazar-te chu awm bawk mah se kum dang nena khaikhin chi a la ni lo. Mipui tam zawk an tawmim a, loh theih lohah lo chuan pawn chhuak duh lo mi ṭhahnem tak an la awm.

Chutihlaiin hripui hläu tawh lem lo, nunphung pangngaia khawsak zui duh tawh mi ṭhahnem tak an awm ve bawk a, a bikin ṭhalai zingah zan lama khawpuia curfew ngaih theih lohna a lian hle. Social media lamah pawh hripui chhuanlama hmanga chhan dang avanga zan lama mipui khuahkhirhna ang zawnga kai leka zan curfew hlip tura nawrna lian tak a kal mek.

Kan hun tawn hi hun danglam tak a nih miau avangin rorelru lam tán pawh rorel a harsa hle ang tih a chiang a, he hunpui lo thleng tur hi him leh hlim taka kan hman theihna turin Krismas Urlawkah fimkhur takin mahni ṭheuh inveng ila, kan nghah Krismas pawh läwm taka kan nghah chhuah ṭheuh theihna turin Vanglaini chhiartute duhsakna säng ber kan hlan a che u.