Zan curfew leh Aizawl

Mizoram sorkar chuan Covid-19 a darh zel lohna tur leh mipui himna turin Aizawl khawpuiah zan dár 9 aṭangin curfew a la kalpui zel a, zan curfew hi kum khat leh a chanve chuang zet chu kalpui a ni tawh.

Zan curfew ngaitheilo leh tihtawp duh an pung zel a, heng zinga a tam ber hi chu ṭhalai niin an lang. Thalaite hian zan lama an thil tih ṭhin tih theih tâk loh an veiin zan lama inhren beh reng hi an ning thawkhat tawh niin a lang a, hunpui a lo ni bawk nen zan lama an zalen loh avangin curfew sawiselna hi a nasa zual a ni.

Sorkar lamin a ngaih pawimawh zawk tur nia lang chu zan lama zalen duh thalaite lam aiin zan lama eizawngtu curfew avanga hna ngai chhunzawm thei lote hi an ni a, heng mite hi an tam tham loh avanga ngaihthah ngawt chi an ni lo a, kum khat aia rei mahni eizawnna duh anga thawh theih loh hi a rei tawh takzet a ni tih sorkarin a hriatthiampui a ṭha hle ang.

Hetihlai hian khawvel hmun dang leh India ram khawpui thenkhatah Covid-19 virus chhuak thar darh chak tak Omnicron avangin zan curfew-te an han puang thar ve leh thung a, hengte erawh hi chu hun rei tak curfew lo thlahdul tawhna hmun, tun hnaia hri lêng thar leh avanga curfew an puan thar lehna an ni tlangpui a; a dár zat thu hlaah pawh Aizawla zan curfew ai chuan curfew ṭan hun hi a tlai deuh niin a lang.

Chhun lama kan khawsak dan leh thil dang zawnga kan inthlahdul tawh dan en hian, zan lama curfew puan hi hripui leng laka kan fihlim theihna tur tih chhuanlama hmanga chhan dang vanga curfew a ang ta lek lek mai.