Awllen leh hripui

Krismas kan hmang zo leh ta a, Mizoram hmun tam zawkah hripui avangin ruai ṭheh theih a ni lo. Mizoramah zawi zawiin hripui dinhmun ziaawm chho zel mah se, India ram state ṭhenkhat leh khawvel hmun dangah virus chi thar darh chak tak mai Omicron avangin hei kai an pung zel a ni.

Krismas leh kum thar inkar awllen hun tak mai hi kan fimkhur loh chuan hun rei tak kan lo fimkhura kan lo inkhung tawhna hi a thai chhe palh thei a, sorkar leh khawtlang vensak ngai loa mahni ṭheuh fimkhur thiam a ṭul ta takzet mai. Mithiamten hripui darh chak chhan an zir chianaah khan ṭhianho, chhungkua leh pawl anga a huhoa awm khawm leh chaw ei khawmte kha an sawi lansar zinga mi a ni a, hei tak hi kan insum thiam a ṭul dâwn hle a ni.

Zêp thu a cheng lo a, Krismas chawlh hunlai hi kohhran leh khawtlang huapa ruai siam a nih loh avangin chhungkua leh thianhoa châw ei khawm leh inhmuh khawm a tam hle ang tih a chiang a, hei tak hi hripui thehdarhtu a chang thei tih hriaa inven a ṭul takzet a ni.

He hripui hi kan do hneh dâwn emaw tihah a zia thlakin a rawn inkar leh ṭhin a, tuna khawvel tiralkheltu leh tibuaitu Omicron a lo luh lohna tura inven leh, Mizorama Covid-19 hri awm mêk a darh zel lohna turin he awllen hunah hian fimkhur takin chawlh i hmang ang u khai.