Sawi hlawh kuhva tawlh

Myanmar aṭanga Mizoram paltlanga kuhva rah ro tawlh chungchang tun hnaiah sawi a tam hle mai a, Champhai DC-in kuhva tawlh ruk a mantir avang leh chumi hnua thil thleng avangin sawi a hlawh zual niin a lang. Champhai DC lakah FIR thehluh a ni a, hetihlai hian Champhai DC chhanin pawl hrang hrangin thuchhuah an siam bawk a ni.

Mizoram kaltlanga kuhva rah ro tawlh hi thil thar a ni lo a, hun rei tak chhung kalpui a ni tawh. Chhungkaw tam takin an din chhuahpui tawh a, hausakpui pawh sawi tur an awm nual tawh a, khaw ṭhenkhat chu he sumdawnna hian a chawi kang hle tiin a sawi theih hial awm e.

Thil buaithlak tak erawh chu kuhvaa sumdawnna kalpui hi dan kalh a ni a, ram pawn aṭanga dan loa kuhva lakluh lo buaipui chiam hi danin a phal lo. Thil pawi tak nia a lan loh avang leh a hlawkna teltu Mizo ṭhahnem tak an awm avang hian a ṭan zawnga sawi pawh an tam hle a; nimahsela dan bawhchhiatna tih chiang tak sawi mam tuma ṭan vak mai hi chu a fel lo hle a ni.

Mizoram sorkar pawh hian dinna chiang tak a neih ngam a ngai a, tun hnaia a hnathawk zingah kuhva rah tawlh man duhtu leh man loha kal tlangtir zel duhtu an awm nia langte hi a fuh lo takzet a ni. State sorkarin mahni rama thar chhuah ni loa GST a lo lâk ngawt dan leh ram pawn aṭanga lehkha mumal awm loa thil lo luta chhiah lo khawn chungchang pawh hi sawi chian a ṭha khawp mai.

Champhai DC chet dan ṭantu leh ṭan lotu lam pawh political party zawngin a inṭhen deuh phawk mai nia lang hi a vanduaithlak a, mahni party rimnamte thil tih a nih chuan a dik leh dik lo pawh sawi loa pawm mai zel hi a fel lo a, chutiang chiah chuan mahni party lo lamte thil tih a nih vanga beih chiam pawh a ṭul lo ang.

Kuhva tawlhin a nghawng pawi tam tak zingah khawthlang lama kuhva chinga eizawngte'n harsatna an tawk hi a veiawm a, kan sorkar hi kuthnathawktute lamah nge a ṭan dâwn dan bawhchhiaa kuhva sumdawnna kalpuitute lamah, tih zawhna pawh a piang thei hial awm e.