Champhai DC laka FIR kal zel

Mizoram Civil Service Association chuan thuchhuah siamin Champhai DC lakah dan loa thil ti ten FIR an thehlut chu titawp vat turin thuneitute an ngen a, FIR kal zel dan en zui an tum thu an chhuah bakah District Magistrate laka FIR thehluh rang taka bawhzui a ni mai chu an hriatthiam loh thu an puang.

MCS Association chuan Champhai DC chunga thil thleng chu democratic institution/district administration leh civil service tihzahawm lohna leh hnuaichhiah tumna ni thei hiala an ngaih thu an tarlang a, Champhai DC thil tih chu sorkar laipui thupek leh state sorkar thupek bawhzuina thil a nih laia a chunga thil thleng zui zel chu an dem thu an tarlang a ni.

Champhai DC hian kuhva tawlh ruk a man chungchangah thlàvang hauhtu a ngah hle a, chung zingah chuan ama telna pawl Mizoram Civil Service Association thuchhuah hian ngaihven a hlawh zual hle niin a lang. MCS-te hian Champhai DC thlavang an hauh rual hian an service zahawmna humhim an tum niin alang bawk a, dan loa che zawk nia langten District hotu lu laka FIR an thehlut leh chu FIR chu police lamin rang taka an bawhzui hian ngaihtuah a tithui hle reng a ni.

Myanmar aṭanga dan loa kuhva phur luh hi Custom lam hi a man theitu an nih pawhin an phurh luh tur dang theitu leh Mizoram chhunga langsar leh ualau taka an phur kual tur lo titawp theitu chu Mizoram Police an ni a, heti zat police check gate an paltlang thei leh dan loa kuhva sumdawnna lian taka police mithmuh ngeia a kal mup mup reng hi chuan ngaihtuah a tithui lo thei lo.

Kuhva rah tawlh ruk sawi laia political party worker thenkhatin anmahni beihna anga an ngai ta emaw tih tura thu an tikual vêl pawh hi ngaihtuah tithui tak a ni tel. Engpawhnise Champhai DC laka FIR thehluh avanga thu kal zel hi Mizoram mipuiin an thlir reng a; kum 2023 maia inthlang tur kan nih tawh avangin dan loa sumdawnna kalpui chungchanga Mizoram sorkar dinna leh a chet zui dan pawh mipuiin an hre chiang châk tawh hle ang.