Tuipuiral

Tuipuiral Zirlai Pawl (TZP) chuan tun hnai khan General Conference vawi 35-na an hmang a, resolution pathum an pass a, chu'ngte chu - East Tuipui huam chhunga Civil SDO dah, sorkar enkawl Higher Secondary School din leh an bial chhunga damdawi-in, doctor awm lohnaa doctor dah phûtnate a ni. 

Tuipuiral zirlaite'n an dinhmun leh Mizo­ram hmun dangte din­hmun thlira rawtna an siamte hi ngun taka thir chuan hma an la sawn lohna nemnghettu angin a ngaih theih. Mizoramah hian a bial leh tlang dung anga Civil SDO awmlohna leh sorkar enkawl Higher Secondary School awm lohna hi a tam vak tawh lo mai thei a, a la nei lo zingah Tuipuiral hi an tel. 

Tunah hian Tuipuiral mipuite chuan sorkar tharah rinna nghatin beiseina sang tak nen inthlanah pawh an hawi lam an tichiang tawh a, an rinna nghahna sorkar hian Tuipuiral mipuite mamawh hi phuhruksak thei se a ṭha khawp mai. Sum leh pai indaihlohna avangin sorkar hian khua zawng zawng a tichangtlung thei hauh lo a; nimahsela hetiang ram bial khat lian tawk takah hi chuan hmasawnna ruhrel din hi a ti thei ngei tur a ni. 

TZP hian tute emaw an bei lo a, tute emaw intihlar tumna lam an ngaihtuah lo a, tute emaw tan an thawk lo; Tuipuiral hmasawnna tur an ngaihtuah tih a lang. Heng an thil phût pathum - East Tuipui huam chhunga Civil SDO dah, sorkar enkawl Higher Secondary School din leh an bial chhunga damdawi-in, doctor awm lohnaa doctor dahte hi sorkar hian a duh chuan a tihlawhtling thei ngeiin a rinawm.