Central YMA an ṭawng chhuak

Central YMA Central Executive Committee tun hnaia ṭhu khawm chuan Mizoram kal tlanga dan loa kuhva tawlh ṭhin an ngaimawh thu leh tihtawp an duh thu an rel a, YMA member-te chu he thila inhnamhnawih ve lo turin an ngen a, thuneitute chu dan loa kuhva tawlh titawp turin an nge. CYMA chuan dan loa kuhva tawlh zir chiangtu tur an din bakah hemi kawnga Champhai DC hmalakna an thlawp tlat thu an chhuah.

Mizoramin kawng hrang hranga harsatna a tawha mipuiin ṭawng chhuak tura an beisei ṭhin chu Central YMA hi an ni a, ram pum aiawh zo pawl lian a nih bakah Mizote innghahna tling a ni. Chutihlaiin chhan hrang hrang avangin CYMA kal danah duh khawp lohna social media leh titi lamah a lang tam hman hle a, sorkar thu ngaichang leh lutuk anga puhna te, tun hmaa CYMA inrawlhna ṭhin niawm taka ngawih a chuh tlat changte leh che chhuak tura mipui beisei anga an chet loh ṭumte pawh a awm ṭhin. Hetih rual hian CYMA hi mipui beisei anga thil zawng zawnga inrawlh leh ṭawng chhuak tur pawl a ni lem lo a, fimkhur taka thil thlir ṭhin pawl a nih angin a che buan buan lo a nih pawhin a ṭhatna zawk a awm thei ang.

Kuhva tawlh ruk chungchangah hi chuan CYMA hi a ngawi rei leh lutuk a, CYMA anga hmalakna hmuh tur a awm har hi kan ramin a tuar ṭan mêk niin a lang a, tuna huaisen taka an rawn ṭawng chhuak ta hi a lawmawm a ni. Kan ram kal tlangin kuhva rah an tawlh ru a ni mai lo a, Champhai kawngpui dai chhe vek khawpa an veivak chung pawhin kan police lamin an man lo a, Custom official an ngawi a, mipui aiawha ṭawng chhuak tur leh a ṭul pawha mipuite puna dan loa sumdawnna (smuggling) lo dang theitu tur berin ngawih a chuh rei em avangin mipui ngaih a ṭha lo hman hial a ni.

Tuna CYMA-in kuhva tawlh ruk a ngaimawh thu a sawi leh, "Mizo hnam nun dan ṭha tichhe theitu leh tichhe mektu," tia huaisen taka kuhva tawlh ruk a rawn puh leh do ngam hi a lawmawm a, a vengtu leh dangru tura beihten kuhva phur lirthei an kal tlang tur zung zung hi CYMA a inrawlh hnu chuan tihtawp theih ngei a beiseiawm.