Halpuah khapna thupek

Mizoram sorkar chuan hunpuiah halpuah hal a khap a, khapna thupek hi district hrang hrangah Bawrhsap-te'n an puang.

He mi hma hian Home Minister hoin kalpuah khap dan tur ruahmanna siamin thuneitute an ṭhukhawm tawh a; October, 2021-ah daih tawh khan Krismas leh kum thar vuakvetah boruak hrisel a awm theihna turin CYMA buatsaihin inzirtirna hun hman a lo ni tawh bawk a ni.

Sorkar mai bakah tlawmngai pawlte'n theihtawp chhuahin hunpuiah halpuah, halmawi, silai lem mu nei leh kêp kahpuah chi bakah sky lantern hal leh chelekte an khap a. Chuti chung chuan Aizawl khawpuiah chuan kumhlui thlah zanah chuan khap loh ang maiin veng tam takah hal a ni.

Sorkar inbuatsaihna lam thlir chuan an inbuatsaih ṭhat kum a ni a, a dawn hnaia khapna thupek chhuah loin hma takah inbuatsaihin halpuah lakluh a nih lohna turin ṭan an la a; amaherawhchu heng khapnate hian zawm a hlawh ṭha lo hle a ni.

Thil lawmawm awm erawh chu mipuiin a hun loa halpuah leh bomb tihpuah mai mai an ching tawh lo a, dan bawhchhiaa hal turte pawhin December 31 zan rei an nghak hram hram niin a lang. Tun hma deuha December chawhnu lam aṭanga halpuah ri dum dum ang kha chu hriat tur a awm ta meuh lo.

Hetihlai hian Aizawl khawpuia halpuah leh puak thei thil dang hal lo tura hlawhtling taka inzirtirna kalpui a nih tawh hnu, sorkar piah lamah media lam thlenga inzirtirna ṭha taka an kalpui avanga mipuiin thu an zawm tawh hnuah khap tumin theihtawp chhuah a ni a, a ruh langa sawi duh chuan a hlawhtling lo viau. Khapna thupek khauh tak tak awm mah se, zan reia mut theih loh tur khawpin a puak nasa tih hai rual a ni lo.

Inkhap beh tum ringawt a sawt lo tih kan hmu chho zel a, inzirtirna ṭha nen a kal kawp a ṭul tih a lang chiang; chumi piah lamah kan kal dan pangngai bak ruahmanna ṭha zawk neih a ṭul tawh a ni thei a, thuneitute'n inenlet chunga ngaihtuahna an sen zau a ngai khawp mai.