Hripui ziarang thar leh Mizoram
Tun hnaiah khawvel pumah Covid-19 hri thar Omicron a darh chak hle a, India ramah pawh lo lut tawhin state tam takin inkhuahkhirhna thar an siam. Delhi-ah chuan kar tawp (weekend) pum curfew puan a ni a, hmun tam takah zan lam curfew an puang thar leh a, lirtheia chuang thei zat leh thlawhtheihna thlawh dan thlengin tihdanglam a ni mek a ni.
Tun hnaia India ram state dangin hripui leng avanga inkhuahkhirhna thar an siam leh Mizorama inkhuahkhirhna kan hman mek hi a inang chiah lo a. Mizoram hi chuan Omicron kan hmelhriat hmaa Covid-19 hripui darh zel kha kan la do hneh ve loh avangin inkhuahkhirhna kan la kalpui zel a ni. Khawpuiah zan lam curfew chawl loa puan a ni a, hnathawh kawngah erawh inkhuahkhirhna a awm tawh meuh lo a, zawi zawiin eizawnna pangngai kalpui leh theih ṭan a ni.
Mizoramah hri kai an tlahniam ṭan a, ngai kan awh chho ṭep tawh tihin India ram chu a phek buai leh ṭan a ni ta ber a, he thilah hian inzir tur kan nei ngei ang. Hripui thawhkhatna kan tih maia India ram a talbuai a, khawvel mit hmuha mualpho khawpa hri kai leh thihpui an tam lai khan Mizoram kha kan fihlim ṭha angreng hle a, ṭhenkhat phei chuan ram hruaitute pawh kan fak hman hle a nih kha. Nimahsela India ram state dang an insiam ṭha a, hripui an do hneh a, nunphung pangngaia an kir leh hnuah pawh keini chu hunpuiah pawh zaikhawm ṭha ngam lo, ruai pawh ṭheh thei lo leh zan lama tihluihnaa inkhung ngai khapin khawpui lam chu a la awm tlat a ni.
Hripui thawhkhatnaah kan chet ṭhat thu kan uanpui titih a, sorkar leh tlawmngai pawlte thawhhona ṭhatziate sawi nuam kan ti a; nimahsela a hripui berin min kiansan lo a, state dangin thawhhnihna an do hneh tawh hnuah pawh a buai rei ber pawlah kan ṭang a ni.
Tuna state dang buaipui Omicron hi a lo lut emaw lut lo emaw kan zavaia kan ṭan a, kan inven tlan a ngai a, a inven dan hre tawh mipuite'n hmai tuam, kut silfai leh puipunnaa tel loh hram kan tum a ṭul takzet.