Sorkarin mawh la ngam se

Health Minister chuan Covid-19 hri thar darh mek avanga inkharkhip zawnga kal tumna a neih loh thu a sawi a, hei bakah hian biak ina inkhawm, zai leh ruaiṭheh chungchangah sorkar inrawlh loin kohhrante rel danah an dah thu a sawi a, sorkarin, 'Ti suh u,' tia inkhap an tum loh thu a sawi a, chutih rual­in medical lam mithiamte'n SOP an siamte ngai pawi­mawh tura chiang taka an inhrilh thu a sawi.

Covid-19 do chungchangah hian sorkar hi fakna tur tam tak a awm a, demna tur pawh tam tak a awm bawk ang. He hri kan do danah leh fimkhur tura kan inkaihhruainaah tihṭhat tam tak a nei a, a fak pawh kan fak nasa a, a tihsualah pawh mipui an phunin sorkar demna thawm a ri ring hle.

Tun hnai hunpuiah sor­karin mawhphurhna la loin kohhrante kutah an kal dan tur a dah lêt a ni ber a, hei hi kawng ṭhenkhata sorkar hri dona kalpui dan nen chuan a inkawkalh hle niin a ngaih theih. Omicron kan hmelhriat hma aṭangin sawiselna karah pawh hri darh zel hlauh vangin sorkar chuan zan curfew hlip loin zana chhuah a la khap tlat a. Chutihlai chuan inkhawm, zai khawm leh ruaiṭheh thlengin zalen takin kohhran kutah a dah hlauh thung a ni!

Engpawhnise sorkar hian Covid-19 hri dona kawnga a tihṭhatin fak a hlawh a, a tihṭhat lohah dem a hlawh dawn tho avangin huaisen takin mawhphurhna la ngam se a ṭha ngawt mai.