Thlai man tisangtute leh sorkar

Cooperation minister chuan loneitute'n man tlâwm taka an thlai thar an hralh laia khârchhâwngte'n man to taka thlai man an tisang chu a dem thu tun hnaia thlai man sang vanga mipuite'n harsatna an tawh sutkian dan tur sawihonaah a sawi chhuak a; thlai man chungchanga ruahmanna siam turin Vegetable Supply Chain Committee an ruat. 

Minister thusawi hi ngun taka ngaihtuah zui chi a ni a, Mizoram harsatna tawh mek leh tun hma aṭanga harsatna awm reng tawh a ni. Mizorama loneitute dinhmun chhiatzia chu a takin kan hmu vek a, an dinhmun chawikanna tura ruahmanna hrang hrangte a takin a hlawhtling hlei thei lo a, tunah pawh kan loneitute hi an la bet hle a ni.

Hetih laia a thawh hah leh harsa zawk loneitute aia thlai khar chhawngtute an hlawk zawk reng mai hi a zia lo hle mai a, chu mi siam dik tur chuan sorkar aṭangin ruahmanna tak tak a la awm lo a tih theih ang. Mizorama sorkarna kaihruai tawhtute zingah thlai thar hralhna ngaihtuah a, an rate tur bituk a, awmze neia kalpui tumna tak tak a la awm loh avangin Mizorama mi thawkrim berte chu 'thingtlang mirethei' tia sawi tur an la ni zel a, a pawi tak zet a ni.

Covid-19 hri len ṭan tirh lama lockdown lai khan sorkarin Vegetable Supply Chain siamin mipui hnena thlai thar ei tur a awm theihna turin ṭan a la a, a hnuah sorkarin sum a chawi belh thu hriat tur a awm a, a zia lo hle a ni. A hralh duhtu an awm a, a lei tur a awm a, a lei duhtu mipui an awm reng chunga 'chawi belh' a nih chuan a ruahmanna a fel lo tihna a ni a, tih tak taka thlai thar lei leh hralh hi sorkar hian a la ngaihtuah tawk lo tih hi chu phat rual a ni lo ang.

Tun hnaia thlai man bithliah tura rawtna awm hi thil lawmawm tak a ni a; nimahsela, hun rei lo te chhunga 'nachhawkna' ang lek ni lo se, loneitute an dam hlen theihna tur leh Mizo mipuite rawk an nih zui tawh lohna tur ni thei se a lawmawm ngawt ang.