Champhai DC thu buai kal zel

December 18, 2021-a Kelkang daia kuhva rah man sa hal kaihhnawiha Champhai bawrhsap laka thubuai ziah luh chu bawhzui a la ni lo a; Police lamin bawrhsap chhui phalna hi Vigilance department-ah an la dil lo.

Hun rei tak chhung Mizorama titi lian ber pawl chu Champhai DC lama FIR thehluh chungchang a ni a, he thil thlen dan leh kuhva tawlh ruk chungchang hian sawi a hlawh hle. Hun rei tak chhung chu ualau takin kuhva hi tawlh ruk a ni a, a dang theitu nia langte'n an dan miau loh avangin Mizoram kaltlangin ram pawn kuhva rah hi India ram rilah tawlh luh ṭhin a ni.

Champhai DC-in kuhva rah a man hnua a laka FIR thehluh hian nghawng a nei lian hle a, Central YMA chuan thuchhuah siamin Champhai DC an thlawp tlat thu an chhuah a. Mizoram Civil Service Association pawhin Champhai bawrhsap an thlawp thu an chhuah ve bakah, "Law Enforcement Agencies-ten mipuite an rah beh a, dan bawh­chhetute emaw, dan zawm lotute emaw nena an inthlun­zawm mai loh nan leh mipui rorelna an hnuaichhiah mai lohna turin MCSA chuan hma a la zel dawn," an ti hial a ni.

Mipuiin titia rinhlelh an neihte an sawi chhuah mai piah lama Mizorama officer lian inzawm khawmte'n law enforcement agency lam chet dan pehhel chung sia na taka an dem hi ngawih bopui chi a ni hauh lo. A nihna takah chuan dan zawm lotute leh dan kengkawhtu turte hi an inthlunzawm mai lohna tura inrawlh an tum ta hial a ni a, kan ram dinhmun hi a fel lo hle tih zep theih a ni lo.

Kuhva rah tawlh ruk chungchanga Champhai DC dinhmun hi ngun taka chhut chuan a laklawh hle mai a, sorkar mi a nihna angin kuhva rah tawlh ruk a man a, a mansakte'n a laka FIR an thehluh chu sorkar mi tho Police lamin an bawhzui nghal mai bawk.

He thila sorkar mi leh sa hrang hrangte chet dan thlir hian ngaih a ṭha zan lo a, Central YMA thuchhuah leh MCSA thuchhuah ngun taka chhiar phei chuan thil chhui chian ngai chu a awm ngei a ni.