State pawn aṭanga lo lutte

Tun hnaiah Mizoram pawn aṭanga khualzin lo lutte luhka hrang hrangah Rapid Antigen Test (RAT) hmanga endik an ni a, Covid-19 positive pawh engemawzat hmuh chhuah an ni. Mizoram sorkar chuan state pawn aṭanga khualzin lo lutte hi endik vek tawh turin thu a chhuah a, an lo luh hma darkar 72 chhunga RTPCR negative result neite erawh endik an ngai lo a ni.

Tun hnaiah Covid chi thar Omicron chu India ramah a darh chak hle a, hei vang hian India ram pum a buai thar leh a ni ber. State tam zawkte hi chu hri leng laka fihlim angin an awm hman tawh a, hri kai hmuh chhuah thar pawh awm mang loin hun rei tak awm tawhin nun dan phung pangngaiah an kir leh ṭan mek tawh. Nimahsela vanduaithlak takin India ramah tun hnaiah hri a darh leh chiam a, state ṭhenkhatah chuan mi sing chuangte positive hmuh thar an ni leh ṭan ta.

Hei vang hian Mizoram pawhin loh theih lohin inkaih­hruaina thar a neih a ṭul a, state pawn aṭanga lo lutte endik hi thil ṭul tak a ni a, chu chu tun hnaia Lengpui Airport-a Covid positive hmuh chhuah thar zat aṭangin a lang chiang a ni. Hetihlai hian airport-a endik loha chhuak ta pawh awm theih a nih avangin state pawn aṭanga tun hnaia lo kirte uluk taka an inenkawl zui zel a pawimawh hle a ni.

India ram hi tun dinhmunah hri kai pun chakna zingah a tel leh ta a, Covid thawhkhatna leh thawhhnihnaah khawvel mithmuha mualpho hial khawpa lo buai tawh a nih avangin buaina lian zawk a thlen hmaa inven a ṭul hle.

Chumi hre renga Mizoram sorkarin state pawn aṭanga lo lutte endikna a kalpui leh ta hi a lawmawm a, hri leng dinhmun a ziaawm hma chu kalpui chhunzawm zel a ṭha awm e.