Vawk vulhtute zangnadawmna

Animal Husbandry and Veterinary (AH&Vety) minister chuan tun hnai khan Guwahati-ah Union minister for Fisheries, Animal Husbandry & Dairying Parshottam Rupala a kâwm a, Mizoram mamawh hrang hrang a thlen a; African Swine Fever vanga department hriatpuinaa vawk an suatte zangnadawmna pek chungchang pawh a sawi chhuak a. Parshottam Rupala chuan tihfel thuai a nih tur thu a lo hrilh a ni.

Mizoramah vawk pul hri leng avangin vawk vulhtute'n harsatna lian tak an tawk a, Covid-19 hripui a leng bawk nen eizawnna kawngah an buai hle a ni. Hetihlai hian vawk pul hri a darh zel lohna turin sorkar lam rawtna angin vawk vulhtu tam takin an vawk an suat a, heng mite hian sorkar aṭangin zangnadawmna dawn an beisei.

Mizoram sorkarin sum a neih mai loh avangin sorkar laipui lamah ASF tuartute tan zangnadawmna an dil a, hei hi vawk vulhtu lamin an nghakhlel tawh takzet a ni. State sorkar tih theih piah lam thilte a awm bawk avangin mipui beisei angin zangnadawmna hi hmuh theih a ni mai lo a, tun hnaia Mizoram AH & Vety Minister thusawi hmang hi chuan an hmu hnai tawh niin a lang a, a lawmawm takzet.

Mizorama vawk vulhtu tam zawk hi chu mirethei leh harsa tak tak an ni a, hetihlaia sorkarin sum hlawm liana vawk vulhtu khawsa thei zawk nia lang a lo ṭanpui chiam maite kha thil mak angreng tak a ni. Tuna hri a len chiah hian a harsa zawkte dinhmun hi a chhe zual hle a ni. Tunah erawh chuan AH & Vety Minister sawi hmangin department hriatpuinaa vawk an suatte zangnadawmna hi pek chhuah a ni dawn hnai tawh a, hei hi vawk vulhtute tana chanchin lawmawm a ni ang.