Sorkar hnathawk hlawh leh sorkar khawsak dan

Mizoram sorkar chuan a hnuaia thawkte zinga group A leh B-te December 2021 thla hlawh a la pe lo a; Federation of Mizoram Government Employees and Workers (FMGEW) chuan a hun taka hlawh pe ṭhin turin Mizoram Chief Minister an ngen.

Mizoram sorkarin a hnathawkte hlawh a hun taka a pe thei lo hi a zialo hle mai a, hei hian sorkar hnathawkte leh Mizoram mipui tán harsatna nasa tak a thlen mek a ni. Mizoram hi thawh chhuah sawi tur nei mumal lo state kan nih avangin sorkar hnathawk hlawhah hian a thawk ve lote thlengin kan innghat lian hle a, chutihlaia a hun taka hlawh pe chhuak thei lo sorkar neih hi chu a pawi hle a ni.

Sorkar hian sum a nei lo hrim hrim a nih chuan mipui pawhin thui tak chu an hrethiam thei ngei ang a; amaherawhchu SEDP sem a sawi ri reng a, mipui nawlpui mamawh pawh ni lo khawpuia lirthei neite dahna turin PAHOSS-ah sum tam tak a seng a, kan mamawh ber ni lem lo contractor (party worker) sum hmuh awlsamna tur hna tam tak a thawk mêk bawk a; hetihlaia mahni mi chhawrte hlawh pawh a huna a pe thei lo hi chu mualphona lian tak a ni.

Tuna Chief Minister leh Finance Minister ni kawp hian budget hi duh duh dana hman theih a nih thu uar takin a lo sawi tawh a, 'kan duh chuan kan kang thei a, kan duh chuan kan bai thei,' ti zawngin a lo sawi hial tawh a ni. Chuti a nih chuan sorkar hnathawk hlawha hmang loin tuna kan mamawh nghal ni lem lo hna dangah kan sum neih chhunte hmangin sorkar hian a hnathawkte hlawh hi a ngai pawimawh lo tihna a ni mai em?

A huna hlawh lâk loh avanga loan rul thei lo te, in luah man leh thil dang a huna pe thei lo tam takte hi an thawh loh vang ni loin an thawh hlawh sorkarin a pek theih loh vanga buai an ni a, a zialo takzet a ni.