Mipui mawhphurhna lam ve thung

Serchhip District Disaster management Authority chu tun hnai khan ṭhukhawmin Serchhip Bawrhsap chuan Covid-19 lakah an district chu a him lo hle tih a sawi a, Aizawl district tih lohah hri kai tamna an ni a, mipuiin dan an zawm ṭhat loh chuan lockdown puan a ṭul tur thu a sawi.

Hripuiin khawvel a tibuai mek a, ram changkang leh hausa kan tihte pawh he hri lakah hian an him lo a, damdawi-in leh inenkawlna nei ṭha zawkte pawhin an thihpui nasa hle. Ram changkangah leh India ram kilah pawh Covid-19 laka invenna ṭha chu hmai tuam, kut sil fai leh midang nena inhnaih taka awm loh a ni a, hei hi mithiam ber berte pawhin hri laka invenna ṭha bera an sawi chu a ni.

Kan hri leng mek laka himna damdawi hi man to tak chu ni se Mizoram aṭangin kan lei ve phak meuh lo mai thei a; amaherawhchu thil lawmawm tak chu mirethei ber pawhin an neih theih tur a invenna a ni hlauh hi a ni. Hri leng laka inveng tur hian thuawih a pawimawh a, sorkar leh mithiamte'n inkaihhruaina an siamte hi thuawih takin zawm hram hram ila a ṭha hle.

Serchhipah hri leng an pun zel avangin district enkawltute an mangang ṭan tawh tih a hmuh theih a, mipuite chu dan zawm ṭha tura hrilhin an zawm ṭha thei ngang lo a nih chuan lockdown puang mai turin an vaukhan ta hial a ni. He hri leng mek kan donaah hian kan duh dan ni loah sorkar kan demin kan sawlsel ṭhin a, hetihlai hian mipui tih ve tur pawimawh tak awmte hi mipuiin hre reng ila, ṭha takin dan i zawm ang u.