A hmuna hnathawh enpui

Chief Minister chuan tun hnai khan Sairang Dinthara Food Corporation of India hnuaia food storage depot sak tura buatsaih mek chu a hmunah a tlawh a; tun hnai vek khan Rangvamuala Ch Saprawnga Truck Terminal chu tlawhin FCI kudam sawnna atan a rem leh rem loh a enfiah.

Mizoram Chief Minister hi fakawmna tak a neih chu hnathawh ṭhenkhat a hmuna a tlawh taima hi a ni a, thuneitu sangin a hmun ngeia kal chilha thil an enfiah chuan; a thawh dan kalhmang thlengin an hre chiang bik dawn tihna a ni a, thil lawmawm tak a ni. Chief Minister a ni emaw, Minister pangngai pawh ni se khaikhin tur hi kan la nei tam lem lo a, a hmuna tlawh taima chi leh office lama hnathawh thlang chite kan nei tawh ṭhin a ni.

Mizorama kan sorkar hotute hian thil nihna tak hi a hmuna kal chilhin enpui zui zel thei se a ṭha hle dawn a, chutih laiin thil ṭhenkhatah chuan a nihna tak hre zawk leh thiam zawk; architect leh engineer lamin an enpui tawh hnua tlawh zin lutuk erawh a fuh ber lo ve thei bawk ang. Chuti chung chuan thil nihna tak hre chiang tura a hmun ngeia kal zar zar theih hi chu duhthusam a ni.

Kan Chief Minister hian Lengpui Airport sak lai mek phei hi chu a vei em em tih a hriat a, a tlawh taima hle a ni. Covid-19 hripui leng kan hlauh vanglai leh mipui pawh kan fimkhura lockdown puana nih chhungte pawh khan Lengpui Airport hnathawh hi a tlawh ṭhin a, vawi hnih khat mai ni lo deuh Lengpui Airport siam ṭhat mek hi a hmunah ngei kalin a tlawh tawh a, a taimakna hi a fakawm hle a ni.