Covid-19 chungchanga inràwnkháwm

Chief Minister hoin tun hnai khan Covid-19 leng mek leh Omnicron lo luh palha hmalak dan tur sawiho a ni a, sorkar lam aiawhte bakah tlawmngai pawl, political party, kohhran leh pawL hrang hrang aiawhte an tel a; hripui leng mek leh hri darh chak zawk leng thei a nih avanga ṭan rual a ṭul thute an sawi a, pawl hrang hrang aiawhte chuan lockdown puanin nghawng a neih nasat avangin loh theih loh thil a awm a nih loh chuan lockdown puan tawh loh an duh thu an sawi hlawm.

Mizoram hi hripui do dan tur duang tura mithiamte mai ni loa pawl hrang hrang aiawhte nena inrawnkhawm ṭhin awm chhun kan ni mai thei a, hei hi hripui chungchangah ni lem lo pawh kan ram kalphung a ni tawh a, expert ni lem lote hi eng pawl emaw hruaitu an nih avang hian thil pawimawh rel turin kohkhawm ṭhin an ni. Hetia inrawnkhawm hi thil ṭhenkhatah chuan a ṭhatna chin a awm ngei ang a; nimahsela mithiam bikte (expert) rawnna tur chi thil bika mithiam ni lem lo (layman) kal khawmin ngaihdan an sawi vak mai hi thil finthlak ber a ni lo mai thei.

Covid-19 kan do danah pawh a tir lamah state dangte aiin kan him rei a, hei hi kan hmai pawh a uang hman hle a nih kha. A nihna takah chuan kan state awmna a kilkhawr deuh piah lamah state dangte angin mipui lut chhuak an tam lo a, sorkar leh pawl hrang hrangte'n theihtawp chhuaha inven hna an kalpui bawk avangin hripui kha a lo lut lo ni loin a lo lut muang deuh kha a ang ta ber a, a buai rei ber state kan ni ta a tih loh theih loh.

Tunah hian state dangin Covid-19 thawh thumna tiin an buaipui a, keini chu a thawh hnihna nen khan a la inzawm pât a ni ber a, nunphung pangngaiah kan la kir ve hman lo a, zan curfew pawh chhum lo chat loa puan a nih bakah kohhran tam zawkah chuan hunpuiah Krismas leh kumthar lawmna ruai pawh ṭheh ngam a ni lo. Chuti chunga hripuiin min kiansan lo leh state dangte pun ruala kan pung thar leh ta vak mai hian kan kalphung hi a fuh tawk lo tih a lantir thei awm e.

Thil danga kan inrawnkhawm ṭhin hi a ṭhat rualin hripui do dan leh inven dan tur chungchangah bik hi chuan inrawn zau chiam lam aiin rawn tur dik (medical expert) rawn thiam a pawimawh zawk niin a lang.