A phena thil awm

Mizoram sorkar chuan MCS ṭhenkhat chu an awmna a sawn a, heng zingah hian tun hnaia Champhaia lirthei pawl hrang hrangin sawn chhuak tura Chief Minister hnena ngen an tum Champhai DC a tel avangin sawi a hlawh hle.

Sorkar hnathawk hi chu sawn theih an ni a, awmna ngaia rei tak awm hi a ṭhat lohna a awm hial zawk ang a, an awmna sawn kual hi thil kalphung pangngai a ni. Hei vang hian Champhai DC pawh hi kum 2020-a awm tawh a nih angin an sawn chhuak ve ta pawh hi hun dang ang chu ni se thil thleng pangngai angin a ngaih theih ang.

Tun ṭuma thil kal dan erawh a dang deuh hlek a, a hma lawkin dan loa kuhva tawlh ruk a mansak avang leh kuva hi a hnuah a kan zui tâk avangin DC lakah hian FIR thehluh a lo ni hial tawh a, District khata hotu lu ber laka dan bawhchhetu lam zawkin FIR an thehluh hi thil thleng khat tak mai ni loin Mizoramah chuan a thlen vawikhatna a nih a rinawm.

Hemi hnuah lirthei neitu pawl hrang hrangten DC hi sawn chhuah an duh thu leh Chief Minister hnena lehkha an thawn tur social media lamah a darh zui chiam a, chumi hnu lawka Champhai DC an sawn chhuak hian sawi a hlawh zui lo thei lo. Politics thil lam ni loin Mizo ṭhalai rual an lungawi thei lo a, Chief Minister an chhân lêt ve theih dan nia an ngaih Mizoram Chief Minister Instagram account lamah thu dang an ziahnaah Champhai DC transfer duh loh thu te, smuggler-te rorelna hnuaiah Mizoram a kun ta tih lam hawiin thu tam tak an post a, CM Instagram account enkawltute hian comment theih lohin an dah zui ta hial a ni.

Sorkar hnathawk transfer avangin mipui hi an lungawi lo niin a lang lo a, a phenah thil a awm nia an hriat avangin Champhai DC transfer danah hian Mizo mipuite hi an lungawi lo ni berin a lang.