School kal loh laia fee khawn

Private school neitute intél khawm, Mizoram Independent School Association (MISA) chuan kumin April thlaa school fee chu tihluihna ni loin a pangngaia khawn ni se an ti a; zirlai pawl pahnih - MZP leh MSU chuan sikul kal theih a nih loh laia school fee a pang­ngaia khawn a ni chu hriatthiam har an ti thung a, sorkar lamin thutlukna an la siam fel lo. 

Covid-19 avangin khawvel a buai mek a, chu chuan mihring khawsak phung nasa takin a nghawng. Sikul pawh an kal thei lo a, chuvangin zirlaite pawh in lam­ah an awm a ngai. Sikul ṭhenkhat chuan zirlaite hi in lama lehkha an zir dan tur an ruahman a, sikul kai thei lo mah se lehkha zir an ṭhulh loh dan an ngaihtuahpui a ni. 

Hei vang pawh hi a ni ang, MISA lam chuan sikul hawn miah loh thla, April, 2020-ah monthly fee chu dan pangngaia lak an rel a; zirtirtute hlawh an pek tho a ngaih piah lamah sikul building luah man pek ngai an awm bawk avangin fee hi la lo thei loah an inngai. Hetihlai hian sum lama harsatna neite tana fee ngaihdam an inhuam thu an sawi tel bawk. 

Zirlai pawl lam chuan sikul neitute chu sikul an hawn loh thla chhung na na na hi chuan fee la lo turin an ngen a, an la a nih pawhin 50% aia tam la lo turin an lo ngen ve thung a ni. Sorkar lam thutlukna la hre lo mah ila, sorkar chuan he thil hi enpui ngei a tum a, mipui tana ṭha berin thu an titlu thei ngeiin a rinawm.

Covid-19 boruak­ah hian mi ṭhenkhatin eizawnna an chân hial a, mi tam tak sum hmuh a tlahniam a, chhungkaw tam tak an rûm mek avangin in neitu tam takin in luah man an ngaidam a, a 

ṭhenin in luah mante an hniam a, ṭanpui ngaite ṭanpuiin sum leh thil dang an pe chhuak mek bawk. Hetiang boruakah hian mipui nawlpui chuan school fee ngaihdam emaw, a hma aia tlem zawka lâk an beisei laiin fee pangngaia lak tumna hian a barakhaih hle niin a lang. 

Sikul dintute hian sikul hmangin ram rawng an bawl ngei a, chutih rualin sikul hmang bawkin ei an zawng a, sum an lalut bawk a, sikul din hi an sumdawnna a ni tel bawk. Hei vang hian pawn lam aṭanga va sawipui leh relpui chiam a harsa mai thei a, chutih rualin mipui tana âwm tawk leh pawm nuam tawk hi chu a awm ngai e.