Thla chanvea hlawh la la lo

Mizoram sorkar hnuaia Group A leh Group B-te chuan nimin, January 16, 2022 thleng khan hlawh an la la thei lo a; sorkar hnathawk inzawm khawm pawl Federation of Mizoram Government Employees and Workers (FMGEW) chuan Chief Minister hnenah a hun taka hlawh pe turin ngenna an lo siam tawh a ni.

Mizoram sorkar hnuaia hnathawkte hian hun rei tak chhung chu hlawh hi a hunah an la thei ṭhin lo a, hei hi sorkar sum indaih loh vang a ni. Tun hnaiah hian thla chanve dawna hlawh pek chhuah chauh chângte a awm a, December, 2021 hlawh chu Group A leh Group B-te chuan January thla chanveah pawh an la la thei lo a ni.

Hei chang hi ni loin Mizo­ram sorkar hnuaiah hian hnathawhna bill hrang hrang tâng a tam hle a, miin an chanvo dik tak an hmuh tur chu an hmu thei lo a, mi tam takin harsatna an tawk mek a ni. Heng zingah hian contractor leh supplier bill tang a tam hle a, ruling party mi leh sate ngei pawh bill tang avanga buai hi an awm ve bawk. Hei chang hi ni loin sorkar laipui lam aṭanga pawisa lo kal tawh si, state sorkarin a pek chhuah theih si loh hi PMGSY, PMKVY leh thil dangah pawh a tam hle a; damlo mangangte bill pawh Mizoram State Health Care Scheme hnuaiah tâng a tam tawh hle.

Sorkar hnathawk pension-te pawisa tur ngei pawh sorkarin a pe chhuak thei lo a, sorkar hnathawkte'n medical reimbursement bill an hmu hleithei lo a, GP fund pawh lak chhuah a harsa viau a ni. Heng thil zawng zawng a thlen chhan hi awlsam taka puh theih chu Covid-19 hripui leng hi a ni ngei mai a; nimahsela hei hi chu 'chhuanlam remchang' mai niin a lang; sorkar hian sum a enkawl dan a thlak loh chuan buaina hi a zual zel dawn a ang hle. Hetianga sum harsatna karah hian minister ṭhenkhat hnuaia hnaahte chuan sum hi a tâng ve ngai meuh lo niin an sawi a, hei hi tak tak ni lo hram se a duhawm hle.

Mizoram sorkar hian sumah harsatna a tawk a nih chuan insumna tur a neihah insum ṭhen se, sum sem chhuah tur lam kan ruling MLA rualin an la ngaihtuah mek laia sorkar hnathawkte'n hlawh an pe thei lo hi a zahthlak a, sorkar hnathawkte thawh hlawh tal chu a hun takah pe ṭhin tawh rawh se.