Sorkar hriatpui loha lo hawte

Home department chuan, India hmarchhak state palia Mizo tangkhangte hruai hawna turah, Mizoram House thuneitute leh YMA hruaitute hnena in hriattir tur tih a nih laiin, in hriattir loa haw ve ringawt mi 150 an awm thu an tarlang a, "Hei hian state sorkar ruahmanna siam­te a tiṭhuanawp nasa hle a ni," an ti. 

Mizoram sorkar hian a haw tur zat in-report milin quarantine-na tur hmun a siam a, an riahna tur leh ei leh in tur thlengin a ruahman a, mahni thua hawte hian chu chu nasa takin an tibuai a ni. Sorkar leh a hnathawktute'n hah taka an beih lai a, an hmalakna tibuai thei tur leh, kan venthawn ber Covid-19 laka him lo thei tura mahni thua lo tâl hrangte hian mi an tibuai viau a ni. 

Mi tangkhang ṭhenkhat hi chuan sorkar ruahmanna siamte hi an hre lo palh ve thei bawk a, chutiang ni loa sorkar ruahmanna ngai pawimawh duh lo leh, sorkar thu zawm loa mahni thua lo haw tumte chungchang hi chu ngun taka ngaihtuah chi a ni ang. Tunah chuan dan angin Covid-19 chungchangah inhrem theihna tam tak tihchhuah a ni tawh a, hetianga sorkar leh mipui tana harsatna thlentute hi a ṭul chuan hrem hial pawh a pawi lo mai thei. 

Hetihlai hian mipuite pawhin mawhphurhna kan nei a, kan ṭhenawm khawveng leh kan hmelhriat zingah state pawn aṭanga lo haw, quarantine center-a dah luh loh an awm a nih chuan kan veng leh khuaa Task Force lam hriattir vat a finthlak ang. 

Covid-19 hri lo lut palh thei vengin ramriah kan unaute an riak chhuak a, sorkar hna­thawkte pawhin hah leh rim takin an thawk a, sum tam tak kan sen meklaia Covid-19 laka him loh theihna sorkar ruahman loh anga lo haw hi a fel lo a, a him lo a, tih loh tawp tur a ni e.