Raltlan leh ramri hnaih khuate dinhmun

Tun hnai khan MJA member-te chuan Myanmar aṭanga raltlan Thingsaia awmte a hmunah an tlawh a, an dinhmunte an zir chiang a; Thingsai khawtlang hruaitute'n an khaw mamawh leh harsatna tawh hrang hrangte an lo hrilh.

Mizoram hi thawh chhuah nei lo state, state pachhia kan nih avangin India ramah pawh a hmasawn chak lo ber pawl kan ni a, sorkar tan thingtlang khaw tin tihhmasawn hi thil harsa tak a ni. A bikin khaw kilkhawr deuha mite phei chu an ngaihsak ṭha tawk lo tih phat rual a ni lo. Hetihlai hian khaw kilkhawr zawka cheng, a bikin ramri hnaiha chengte'n tun hnaiah Myanmar raltlan tam tham tak an mikhual tak reng avangin a bik taka ngaihven an phu hle.

Myanmar nen hian ramri thui tak kan inṭawm avangin Mizorama raltlan lo lutte hi district hrang hrangah an lo lut a. Heng mi mangangte lo tuamhlawm a, lo enkawl hi kan tih tur dik tak a ni a, chumi piah lamah kan unaute an nih avangin kan hnar thiang lo. Heng raltlan enkawl hna thawh mek hi sorkar laipuiin a la pawmpui lo niin a lang a, kan Chief Minister zin khan sorkar laipui lam hi raltlan dawnsawn kawngah a hmin fel thawkhat tawh nia sawi a ni a, ṭanpuina sum hi rawn pe chhuak thuai se a duhawm hle a ni.

Ramri hrula awm khuate hian kawng hrang hrangin puih an mamawh a, raltlante ei leh in tumsak ngawr ngawr piah lamah an mamawh hi a khua azirin a ṭhen chu a lêt dawnin a pung thei hial ang.

Kan sorkar hian he dinhmun hi a hmuh hmaih hauh lo ang tih a rin theih a, sum indaihlohna karah pawh hian puih ngai bik leh enkawl ngai bik khua hi zir chiangin ṭanpuina pek theih dan awm se a lawmawm khawp ang.