Lunglei RT-PCR laboratory pawm hi Mizoram tan thil lawmawm tak a ni

Lunglei khawpuia RT-PCR Laboratory bun thar chu Indian Council of Medical Research (ICMR) chuan a ṭha tawkah ngaiin a pawmpui tawh a; he laboratory hi Tourist Lodge building-ah siam niin nikum December khan Health Minister-in a hawng tawh a ni.

Mizoram hi hun rei tak chhung chu India rama RT-PCR Laboratory nei tlem ber kan ni a, chutihlaiin Covid-19 avanga lovkdown kalpui rei ber leh zan curfew nei rei ber a ni thung. A endikna leh a enfiahna lam buaipui lam aia mipui lam khuah­khirhna kawngah kan hotute an kal na zawk emaw tih mai tur a ni a, chhim lam mipuite tana pek RT-PCR khawl pawh politics thil vir vel avangin Mizoram sorkarin hun rei tak chhung a hmang duh lo.

Sorkarin laboratoty din theih a nih leh nih loh endik tura mithiam rual a tirhte chu sorkar lam mite vekin mithiam an tel loh avanga a rintlak loh thute an sawi ang lawi a, mipuiin laboratory an nghahhlelh tawh laiin thuneitu lam aṭang chuan a din harsatzia sawifiahna lam hlir hmuh a ni. A khawl (RT-PCR) ber pek a nih tawh hnua a laboratory an din lawk loh avangin mi ṭhahnemngaite court-ah kalin an zualko a, court-in thu a pek angin Mizoram sorkar chu Lunglei khawpuia RT-PCR laboratory din lo thei loin nawr chêp a ni ta a ni.

He thila vanduai­thlak tak chu Lunglei district-a MLA-te'n an mipuite hriselna piah lamah nunna hial nghawng thei thil an buaipui laia sorkar an nawr ngam lo leh mipui thlavang an hauh ngam lo kha a ni. Lunglei mipuite hriselna aiin political party an dah hmasa ta hial emaw tih theih a ni a, hetiang hi thleng zui tawh lo se a ṭha hle a ni.

Lunglei mipuite leh chhim lamin an hman ṭawm theih tur RT-PCR Laboratory Lunglei khawpuia din a ni ta hi a lawmawm a, a din dan chu eng pawh lo ni se, hman theiha peih fel a ni ta hi thil lawmawm tak a ni.