Sorkar sum leh Covid-19 dona

Congress Legislature Party (CLP) chuan, Covid-19 dona atan sum thawh a ṭul a nih chuan minister leh MLA-te'n hma an hruai tura an ngaih thu an sawi a, sorkar hnathawkte hlawh tel loa Covid-19 do theih a nih an la beisei dan an puang. Covid-19 dona atan tun thlenga sorkar budget hman a la tlem thu te, sorkarin a duh phawt chuan a sum neih sâ aṭanga a theh chhuah theih thu te, Chief Minister berin sum tamzia hlir a la sawi thute an sawi chhuak.

Sorkar hian Covid-19 dona atan hian sum hi a seng lo a ni lo a, tuna a hman zat pawh hi a ṭhahnem tham hle. Mizoram budget-a lang si lo sum hmanna tam tak a awm a, hei vang hian sorkar hian sum hi a mamawh belh dâwn tih a chiang a, Mizo mipuite pawhin sorkar puih inhuamin Chief Minister's Relief Fund-ah sum ṭhahnem tak an chhung lut tawh a ni. 

Hetihlai hian Finance Minister hian tun thlengin mipui vantlang hriatah sum harsatna lam hi a la sawi tam lo hle a, mipui benga cham reng chu Covid-19 dona atana sum a awm thu leh Assembly Budget Session lama sum tamzia a sawite kha a la ni.

Tunah zet chuan kan ram sum dinhmun a ṭha tawk lo niin a lang a, Chief Secretary hoa sorkar hnathawk pawl hruaitute kal khawm hmaah pawh kan sum dinhmun a ṭhat lohzia sawi a ni ta. Mipui hian tun ang huna sum tam tak neih lam an beisei lo a, ram pum leh state dangte pawh an buai tih hi an hrethiam a; nimahsela kan sum dinhmun dik tak hi Finance Minister aṭanga sawi lan hun hi mipui hian an nghak niin a lang. 

Mipuiin an hriat duh chu sorkarin Covid-19 dona atana sum a hman tawh zat dik tak hriat a, Covid-19 atana sum la awm zat leh sum lo lut tur beisei zat hriat a nih hmel a; Mizoram sorkar hian sumah harsatna a tawk a nih chuan Finance minister hian thil awm dan dik tak puang se, sorkar hian sum a nei lo tak tak a nih chuan, Mizo mipui hian sorkar pui turin an theihna zawn apiangah sum thawh an inhuam ngei ang.