Misual tlem zawkte rorelna

MPCC President chuan Mizoram dinhmun a ṭha lo hle tih sawiin, "Mexico leh Colombia angin duh lo chung chung misual tlem zawkte rorelna ramah kan chang mai ang tih a hlauhawm," a ti a; Bihar CM hluiin lehkhathiamte ring loa lehkha thiam lo zawkte a rin luih tlat avanga misualte huangtauna ram an nih dante a sawi.

Political party-te hi mahni hamṭhatna tur zawng reng reng an nih piah lamah an khingpuite chhiatna tur lam zawng ve reng ṭhin an nih bawk avangin an thusawi hi mi tam takin ngaiah an nei tawh - an sawisel pawh kan en liam a, an fak chiamte pawh hi kan en liam deuh mai mai niin a lang. Chutihlaiin tuna kan ram dinhmun a hre chiangte'n an sawi leh ziaka chhiar tur awmte hi politics tarmit aṭanga thlir loa ngun taka kan en chian ngam chu a ṭul takzet tih kan boruak thlir hian a hriat theih.

Khawvel ram dangte kan thlir a, history lam kan en pawhin khawi ramah pawh dan rorelna ngaih pawimawh a nih loh a, mi hausa dan pawisa lo an tamna ramah buaina a zual ṭhin. Kan ram hi ram dangte nen khaikhin ralah chuan dinhmun chhe takah a awm hranin a la lang lo; nimahsela dan loa sumdawnna lian tham kalpui a nih reng a, chin hriat loha mi hausa uchuak an chhuah thut thut reng chuan thil ṭha lo zawk a hring chhuak ṭhin tih khawvel history chhiarin a chiang hle a ni.

Kan ramah hian sorkar phal loh thila sumdawng lui tlat hi a lu nungin chhiar ila an tam hauh lo ang. Mahse chumite chuan pawisa an ngah em avang leh politics-a mi challangte an lo tihlawm thiam avang emaw ringawtin kan hmu lo der reng tur a ni lo a, dan loa thil kalpui na na na chu dan hmanga tihtawp mai hi a chinfel dan ṭha ber a ni ang. Engpawhnise 'misual tlem zawkte rorelna ram' hi chu a thleng lo turah ngai ila, chutih rualin tun ang dinhmuna kan din tawh hnua Mizorama mi ṭha tam zawkte an ngawi ṭhup reng erawh thil fel ber a ni lo ang.