Sorkar sum dinhmun hriat a ngai

Sorkar hnathawk pawl hrang hrangte inzawm khawmna, Fede­ration of Mizoram Government Employees & Workers (FMGEW) hruaitute tun hnaia ṭhukhawm chuan, sorkar hnathawkte hlawh Covid-19 dona atana thawh tura thutlukna awm chu ennawn turin Chief Secretary ngen an rêl. 

May 5, 2020-a Chief Secretary hoa sorkar hnathawk pawl hrang hrangte ṭhukhawmin Covid-19 dona atan kumin May-December chhung thla tin sorkar hnathawk group A, B leh C-te hlawh aṭanga 10% leh group D-te hlawh aṭanga 5% thawh tura thutlukna an siamah an member lungawi chiah lo an awm niin FMGEW hruai­tute chuan an sawi. 

Sorkar hnathawk­ten anmahni duhthu ngeia Covid-19 dona atan sum an thawh nia a lan laia sorkar hnathawk pawl lian berin an pawisa thawh tur chungchang Chief Secretary hnena ennawn tura ngenna an thehluh avang hian zawhna tam tak a piang. 

Sorkar hnathawkte kha anmah­ni duh thu chiah loin tute emaw duh danin thil an relpui a lo ni zawk em? Sorkar hnathawkte khan anmahni duhthua May - December Covid-19 dona atana pawisa thawh inhuam vek tawha lang si, eng vanga inhuam lo leh ta thut nge? Heng zawhnate hi a chhanna dik tak hriat a ṭha hle.

Hei bakah hian Chief Secre­tary-in anmahni duh thu ngeia pete 'chhinchhiah' an nih tur thu a sawi rual chiah hian, a pe lote pawh chhinchhiah an ni nghal lo thei lo a, hei hi sorkar hnathawkte enkawl dan ṭha ber a ni lo palh thei a, ennawn a ngai khawp mai. Sorkar hnathawkte hian an thawhna azirin sum ṭhahnem tak Covid-19 dona atan hian an lo thawh tawh a, sum thawh tawh leh la thawh ve lote hrut rual vek mai pawh hi thil fel ber a ni lo thei. Hri donaa a hmatawnga ṭanga office hun pangngai piah lama thawkte pawh hi a remchan chuan âwl thiam pawh a ṭhat hmel. 

Engpawhnise Finance minister berin sum harsatna hi vantlang hriatah a la sawi lo a, chuti chunga sorkar hnathawkte thawhlawm thawh tura rem lo ruatpui pawh hi a phenah thil awm a awm lo ang tih rin ngam a harsa hle. 

Sorkar hnathawkte hian sorkar sum awm dan dik tak hi hria se, Finance minister hian puangzar se, an sum thawh inhuam dan dik tak a hriat theih awm e.