Tripura-a chhuk tawh Bru-te Electoral roll-a an la awm hi

Mizorama awm ṭhin Bru mi 11,772-te chu Tripura-a anmahni duh thu ngeia an chhuk hnuah January, 2022-a Mizoram Electoral Roll 2022 tihchhuahah an hming a la chuang. Mizoram Election department lam chuan heng mite hi Tripura lama ziah luh an nih theihna turin an tih tur angte an tifel tawh a, Tripura sorkar lamin an tih tur ang an tihfel ve hunah Tripura lamah ziah luh an ni ang.

Inthlan dawn apianga kan buaina ṭhin chu heng Bru-te chungchang hi a ni a, anmahni duat takin an camp-ah ngei vote thlak theihnate siamsak an ni ṭhin a, Mizoram chhunga roreltu thlanna hi Tripura-a refugee camp-ahte neih a lo ni hial tawh a ni.

Mizorama pawl hrang hrang leh political party-te ngei pawhin Tripura-a chhuk tawh Bru-te hming hi Mizoram electoral roll aṭanga paih ṭha an tih thu sawi ṭhin mah se, inthlan a nih dawn meuh chuan a ruka heng mite lo zuk dawr duh pawlte an awm zel a, a vanduaithlak hle a ni.

Bru-te hi an awmna state-a vote an neih hi dan angin a thiang a; nimahsela an chhuahsan tawh state-a vote an la nei reng leh chhuanlam hrang hrang thiam taka an siam ṭhin hi Mizoram tan a hnawk hle a ni.

Tunah chuan Mizoam Election department lamin an tih tur angte tifel tawh mah se Tripura electoral roll lamah ziah luh an la ni lo cheu a, nakin lawkah tihfel theih mai tur tia kan sawi lai hian kum 2023-ah mai hian Mizoramin roreltu a thlang leh dawn a, he mi hma ngeia Mizoram electoral roll aṭanga paih fel hi a ṭul hle a ni.