Ex CM-in CM a zawhna kha

MPCC president Lal Thanhawla chuan, "Covid-19 dona atan hian sorkar laipui aṭangin sum ṭhahnem tak a lo kal a, NEC aṭangin sum kan hmu bawk a, pawisa awm zat hi mipuiin hriat an duh. Sorkar hian Covid-19 dona tur sum a nei lo a nih chuan mipuiin an theih ang pawisa thawh hi an hnial ka ring lo," a ti. 

Mizoram mai pawh a ni lo, India huap pawh hian politician-te'n zawhna an inzawh tawh hi chuan mipui thil thlir dan hi a dang zo tawh ṭhin a, tun hnaia mipui ngaihven tak pakhat  sorkar sum awm zat leh a chet dan zawhna Chief Minister hluiin Finance Minister (Chief Minister) hnena a zawhna pawh hi politics thila inzawhna leh inpuhna pakhat ang lekin a ngaih theih ang. 

Chumi lehlamah chiah chuan a zawttu chu tu pawh lo ni se, Mizoram sorkarin Covid-19 dona sum a kalpui danah hi chuan mipui hi an hmin zan lo niin a lang ta. A tira hri do tura kan ṭan rual viau laiin tun hnaiah thil awm dan hriat chian duhna a lian ta hle. Sorkar aiawh nia puh theih turin Chief Secretary ngeiin sorkar hnathawk hruaitute ko khawmin Covid-19 dona tura sum 'thawh' dan tur a sawipui a, pawisa 'thawh' tura thutlukna awm tawh pawh ennawn tura ngenna a lut leh tawh a, chuvangin Covid-19 dona sum kal dan hi chu mipui hian an ngaihven tawlh tawlh dawn niin a lang. 

Tuna mipui rilrua zawhna lian ber chu kan Finance changtu Chief Minister-in sum tamzia a sawina a la rei loh tehlul nen, sorkar kum thara budget an hmang ṭan dawn dek deka Covid-19 dona tur sum kan khawn ṭan anga lang hi a ni. "Pawisa kha a tam tak tak lo chungin an lo sawi tam chiam nge, pawisa tam kha an thup bo a, thil dangah hman an la tum zawk?" tih hi mipuiin hriat an duh.

Tunah hian khaw­vel a buai mek a, kan hriat lawk loh leh ngaihtuah tel loh sum hmanna tur tam tak a lo awm ta. Hetiang hunah hi chuan sorkar hian hun pangngaia a sum hman tum dan kha a remchang ta lo a, hri dona atan sum tam zawk thehchhuah a ngai tih hi pawm mai se, sum hman tum dan kalphung pawh her rem thei se a duhawm khawp mai.

Mipui nawlpui thlirnaah chuan sorkar hian a sum neih zat dik tak leh a hman tum dan a puangzar ṭha tawk lo a, Covid-19 dona tura sum awm zat leh a hman tawhna pawh a puangzar ṭha tawk lo a, hei hi Chief Minister kal chhuak tain tuna Chief Minister ni mek a zawhna pawh hi niin a lang. 

A zawttu leh a zawha chu tu pawh lo ni se, he zawhna hi sorkar thuneitu lam hian politics rimnam miah loin Mizo mipui hriat turin sawi fiah thei se a lawmawm ngawt ang.